DILI, 04 Maiu 2026 (TATOLI)–Tribunál Judisiál Primeira Instánsia Dili (TJPID), Tersa ne’e, deside hasai despaisu hodi mantein despaisu anteriór hodi aplika Aprezentasaun Períodika ba sidadaun Indonézia na’in-10 no aplikasaun medida kausaun $10.000 ba sidadaun Indonézia na’in-10.
Arguidu na’in-10 ne’e kompostu husi YA, KKS, ZD, AJ, BST, MI, JO, MR, PG no YMK.
Iha interogatóriu dahuluk ne’e, Ministériu Públiku (MP) promove arguidu sira ho krime esplorasaun jogu ilísitu no asosia ba kriminoza brankeamentu kapitál ne’ebé mak tenta atu halai sai hosi justisa Timor-Leste nian.
Despaisu ne’e lee sai hosi Juíz Estájiariu, Angelito Mendes Ribeiro, ne’ebé deklara katak durante produsaun faktus, arguidu sira konfesa faktus no ema mak konsola sira atu bá sira-nia rain.
Notísia relevante : Arguidu na’in-11 ne’ebé envolve online scamming tenta halai sai husi territóriu nasionál
Defeza ba arguidu na’in-10, Advogadu Privadu, Julio Cardoso, hateten, Tribunál nia despaisu mantein despaisu anteriór hodi aplika medida koasaun Aprezentasaun Períodika semana ida ba aprezenta-an dala-tolu iha TJPID no Tribunál mós aplika medida kausaun $10.000 ba arguidu sira atu garante prosesu investigasaun iha Timor-Leste.
“Kontinua aplika mós medida kausaun $10.000 ba arguidu na’in-10 atu garante ba Estadu,” Advogadu Privadu, Julio Cardoso, informa ba Jornalista sira iha TJPID, Kaikoli, Segunda ne’e.
Nia hatutan, Tribunál aplika medida koasaun Aprezentasaun Períodika ne’e ba dala-tolu, atu nune’e Autoridade Seguransa bele asegura sira no bainhira sira halai dala-tolu mak sira sei kumpri Prizaun Preventiva.
“Aprezentasaun Períodika ne’e para Polísia sira bele asegura sira-nia atividade loroloron, nune’e Polísia sira bele tau-matan katak sira sei iha Timor. No despaisu ne’e justu ona ba ha’u-nia kliente agora sira halai sai ne’e la tuir desizaun maibé sira tuir iha artigu 244⁰ iha Kódigu Penál nia sira viola tanba nia moldura penal 3 anos. Agora kona-ba faktus ne’e la priense iha elementu krime tanba artigu ne’ebé mak atu kondena ne’e nia moldura tenke 5 anos ba leten,” nia afirma.
MP nia alegasaun ne’ebé reprezenta Prokuradór, Matias Soares, husu Tribunál atu halo alterasaun ba medida koasaun Prizaun Preventiva no medida kausaun ne’ebé mak antes ne’e iha ona tanba antes ne’e arguidu sira komete online scam.
Defeza ba arguidu nain-10, Advogadu privadu, Julio Cardoso, husu Tribunál atu aplika medida koasaun Aprezentasaun Períodika no aplika medida kausaun ba nia kliente sira tanba nia kliente sira halai sai husi Timor tanba ema mak obriga sira.
Nune’e, MP promove arguidu na’in-10 ho krime esplorasaun jogu ilísitu, Asosiasaun Kriminoza Brankeamentu Kapitál ho nia prosesu NUC. 0323/25.PNSIC ho medida koasaun aplika ba arguidu sira mak obrigasaun Aprezentasaun Períodika no medida Kausaun ho valór $10.000.
Iha loron 30 Abril 2026, arguidu sira sa’e Bus ho naran Elboy, ho xapa matríkula A 30-457, husi Dili bá Suai ho motivu atu ultrapassa fronteira Suai husi dalan bá Malaka, Atambua, Indonézia.
Kuandu to’o tiha iha área Faulata, Aldeia Quesamau, Suku Kasa, Postu Administrativu Ainaru-Villa, Polísia Nasionál Timor Leste (PNTL) Munisípiu Ainaru pasa revista ba bus referida no hetan arguidu sira iha laran, nune’e halo detensaun ba arguidu sira pur volta 13:00. Depois entrega arguidu sira ba ekipa Diresaun Servisu Investigasaun Kriminál (DSIK) no kontinua halo detensaun iha flagrante delitu ba arguidu nai’n-10 tanba atu halai husi prosesu justisa ne’ebé sira enfrenta, tuir dispostu art. 217⁰, 218⁰ no art. 219⁰ husi Kódigu Prosesu Penál.
Nune’e, iha indísiu katak MP promove krime foun ba arguidu sira hanesan krime dezobediénsia tanba la kumpre desizaun TJPID no atu halai sees husi justisa.
Iha audiénsia interrogatóriu dahuluk ne’e, prezide hosi Juíz Turnu Estajiáriu, Angelito Mendes Ribeiro, MP reprezenta Prokurador, Matias Soares, arguidu sira hetan asisténsia legál husi Advogadu Privadu, Julio Cardoso.
Jornalista : Natalino Costa
Editora : Julia Chatarina
