DILI, 06 Maiu 2026 (TATOLI) – Deputada husi Bankada Kongresu Nasionál Rekonstrusaun Timorense (CNRT, sigla portugés), Cedelízia Faria dos Santos, sujere ba Sekretária Estadu Komunikasaun Sosiál (SEKOMS) atu kontinua fó kapasitasaun ba jornalista sira hodi bele hasa’e koñesimentu.
Nia hato’o sujestaun ne’e relasiona ho inisiativa SEKOMS nian atu halo revizaun ba Lei Komunikasaun Sosiál.
Tuir nia, seidauk nesesáriu atu halo revizaun ba lei no loloos presiza tau atensaun mak fó kapasitasaun kontínua ba jornalista sira iha rai-laran no bele halo estudu komparativu iha nasaun seluk.
“Ita preokupa uluk mak lei. Taka dalan ba ita-nia jornalista sira labele halo ida -e’e no ida ne’ebá, hanoin ne’e mós ladún di’ak ida”, nia hateten iha Parlamentu Nasionál, ohin.
Cedelízia mós parabeniza jornalista no mídia hotu tanba Timor-Leste nia Índise Liberdade Imprensa Mundiál ne’ebé fó sai foin lalais ne’e ho klasifikasaun di’ak.
“Kona-ba lei buat hotu lao di’ak hela. Tanba sá mak halo uluk alterasaun ba lei ne’e. Ne’ebé, ha’u hanoin seidauk nesesáriu atu halo alterasaun ba lei ne’e. Preokupa mak ID falsa [iha mídia sosiál]. Tuir loloos SEKOMS haree lai kona-ba ida-ne’e, koordena ho liña ministeriál sira seluk haree lai lei sira ne’e, depois mak haree fali Lei Komunikasaun Sosiál. Hanoin presiza más seidauk iha tempu no presiza kapasitasaun barak, halo serbisu di’ak ona, aumenta tan ne’e di’ak liután”, nia afirma.
Iha sorin seluk, deputadu, Joaquim dos Santos Boraluli, husi Frente Revolusionária Timor-Leste Independente (FRETILIN) apoia inisitiva revizaun ne’e, liuliu atu regula di’ak liután plataforma dijitál mídia online ne’ebé barak agora eziste.
Notísia relevante: SEKOMS kontinua diskute revizaun ba Lei Komunikasaun Sosiál
Jornalista: Nelson de Sousa
Editora: Maria Auxiliadora
