DILI, 10 Maiu 2026 (TATOLI)—Prezidente Repúblika, José Ramos-Horta, to’o ona iha aeroportu internasionál Jacksons iha dadeer ne’e husi Singapura, hodi marka inísiu ba ninia Vizita Estadu dahuluk iha Papua Nova Giné.
Notísia Relevante: Prezidente Ramos-Horta hala’o vizita Estadu dahuluk ba Papua Nova Giné
Tuir komunidadu imprensa husi Palásiu Prezidensiál ne’ebé Tatoli asesu, haktuir katak Prezidente Repúblika simu ho protokolu formál nu’udar Xefe Estadu ne’ebé komesa misaun loron haat nian hodi hametin kooperasaun bilaterál no haforsa kooperasaun estratéjika entre nasaun Melanézia rua ne’e.
Vizita ne’e koinside ho Simeira Inaugurál Oseanu Melanézia nian, iha ne’ebé Prezidente Ramos-Horta sei hamutuk ho Primeiru-Ministru James Marape no líder rejionál sira seluk iha APEC Haus. Programa ofisiál ne’e inklui vizita kortezia ba Governadór Jerál, Sir Bob Bofeng Dadae, no reuniaun bilaterál nível aas ne’ebé foka ba governansa oseanu, reziliénsia ekonómika, no diplomasia rejionál.
Durante simeira ne’e, hein katak Timor-Leste sei hamutuk ho viziñu pasífiku sira hodi promete apoiu ba meta biodiversidade globál 30×30. Hodi foti importánsia hosi viajen ne’e. Prezidente Ramos-Horta enfatiza katak Timor-Leste hamriik ho solidariedade hamutuk ho nasaun Melanézia sira hodi proteje sira-nia “eransa azúl” no garante moris-di’ak ba jerasaun foun sira.
Jornalista : Nelson de Sousa
Editor : Cancio Ximenes
