DILI, 11 Maiu 2026 (TATOLI)—Diretora Diresaun Nasionál Transporte Terrestre (DNTT), Maria Antónia Vitor da Costa, hateten DNTT sei fó koima $45,00 ba motorista sira-ne’ebé hasa’e tarifa transporte públiku ba pasajeiru sira.
“DNTT liuhusi Departamentu Seguransa Rodoviáriu no Departamentu Tráfiku nafatin halo kontrolu no husu ba pasajeiru sira atu hato’o informasaun no hasai fotográfia xapa matríkula, bainhira motorista ida hasa’e tarifa, atu DNTT bele aplika koima $45.00,” Diretora Nasionál Transporte Terrestre, Maria Antónia Vitor da Costa, hateten ba Agência Tatoli iha nia kna’ar fatin, Balide, ohin.
Tanba, nia informa, Diresaun Nasionál Transporte Terrestre (DNTT) seidauk iha despaixu atu autoriza motorista sira hasa’e tarifa transporte públiku ba pasajeiru sira tuir sira ida-idak nia hakarak.
Nune’e, husi parte DNTT nafatin husu ba motorista sira labele hasa’e tarifa ba pasajeiru sira liu fali folin kombustível, tanba folin mina anteriór ne’e ho montante $1.10 sentavu maibé ho situasaun agora presu sa’e ba $1.50 sentavu, signifika katak presu sa’e de’it ba $0.40 sentavu.
Nia hatutan, motorista sira-ne’ebé hasa’e tarifa transporte púbiku ne’e asaun ne’ebé motorista sira halo kontra ona orden autoridade.
“Signifika motorista sira tenke mantein ho tarifa anterior hanesan ba transporte inter urbanu hahú husi $2.00 ba fatim besik no presu $15.00 ne’e ba Suai, enkuantu mikrolete urbana Dili nian ba pasajeiru normál $0.25 no ba estudante $0.15 sentavu,” nia dehan.
Jornalista : Alexandra da Costa
Editór : Cancio Ximenes
