DÍLI, 12 Maiu 2026 (TATOLI) — Ministru Obras Públikas, Samuel Marçal, klarifika katak eletrisidade kontinua mate tanba kauza hosi fator prinsipál rua: demanda no konsumu enerjia aumenta no distánsia entre subestasaun dook ba malu.
Ministru Samuel hato’o deklarasaun ne’e iha serimónia asinatura kontratu pakote 51 ho kompania sira, relasiona ho instalasaun rede eletrisidade ba aldeia 141 iha teritóriu nasionál. Eventu ne’e hala’o iha Salaun Katedral, Díli, Tersa-feira (12/05).
Ministru ne’e explica katak ekipa tékniku sira kontinua servisu atu rezolve problema interrupsaun enerjia ne’ebé afeta aktividade komunidade.
“Demanda ba eletrisidade aumenta tanba númeru populasaun sa’e. Alein ida ne’e, distánsia subestasaun sira sei dook ba malu hodi difikulta tebes ba manutensaun,” dehan Ministru.
Nia subliña katak, tuir padraun tékniku, distánsia ideal entre subestasaun sira mak kilómetru 25 to’o 30. Maibé, iha realidade agora distánsia entre subestasaun sira entre kilómetru 75 to’o 100 ne’ebé difisil atu kontrola sistema.
“Imajina iha Díli de’it, ita iha subestasaun ida de’it ne’ebé kobre área Díli, Railaco to’o Ermera. Ne’e mak kauza eletrisidade mate beibeik,” nia hateten.
Ministru Marçal mós afirma katak Governu sei investe iha konstrusaun subestasaun foun iha munisípiu sira hanesan Ermera, Aileu no munisípiu seluk, ho objetivu atu garante fornesementu eletrisidade ne’ebé estavel.
“Espera katak subestasaun sira ne’ebé ita konstrui sei inaugura hamutuk ho projeitu kabu subterraneu iha Becora, Díli. Ho infraestrutura ne’e, ita espera bele minimiza eletrisidade mate-lakan iha Timor-Leste,” nia konklui.
Jornalista: Camilio de Sousa
Editor: Filomeno Martins
