DILI, 13 Maiu 2026 (TATOLI)—Diretór Ezekutivu Hospitál Nasionál Guido Valadares (HNGV), Nuno Vital Soares, hateten iha fulan-Juñu nia laran HNGV halo rekrutamentu ba profisionál saúde hamutuk 400-resin atu prienxe no servisu ba edifisiu pediatria andar lima iha HNGV.
“Tempu badak, HNGV prepara halo rekrutamentu tan profisionál saúde sira atu apoiu iha área rekursu umanu nian liuliu iha área enfermajen, médiku jerál, tékniku aliadu no parte ne’ebé mak nesesáriu sira. Ami-nia alvu atu loke vaga refere iha fulan-Juñu ne’e hahú prosesu dokumentu sira hotu no sei ramata iha fulan-Agostu no Setembru,” Nuno Vital hateten ba jornalista sira iha HNGV, ohin.
Antes ne’e, Diretór Servisu Apoiu Diagnóstiku no Terapêutika HNGV, Vidal Lopes, informa relasiona ho konstrusaun edifísiu pediatria andar lima ne’ebé sei finaliza iha tinan 2026, mak HNGV planeia atu halo rekrutamentu ba profisionál saúde bazeia ba nesidade ospitál nian.
Edifísiu pediatria andar lima atinje ona 60% no tuir planu iha fulan-Marsu tinan 2026 ne’e, emppreza sei entrega ba Govenu, ho nune’e Hospitál Nasionál Guido Valadares iha ona planu atu halo rekrutamentu ba profisionál saúde bazeia ba nesidade ospitál nian.
“Klaru iha tinan 2026, Hospitál Nasionál Guido Valadares sei planeia atu halo rekrutamentu ba profisionál saúde atu bele prienxe ba ospitál andar lima ne’ebé mak iha. Fatin ne’e ita harii de’it loos ona, tenke ita enxe ho ekipamentu médiku no naun médiku, persiza tan funsionariu. Entaun sei halo rekrutamentu ba funsionariu, la’ós mamuk de’it. Servisu boot ida, ita tenke enxe fali ekipamentu sira kada andar ne’e, hodi nune’e ita bele halo atendimentu ba pasiente,” Vidal de Jesus hateten ba jornalista sira iha nia kna’ar fatin, Bidau Tokoh Baru.
Nia dehan, tanba funsionáriu ida agora de’it seidauk sufisiente depois over load tan no balun halo servisu liu tiha ona nia kapasidade ne’ebé presiza iha tan rekrutamentu.
“Iha ona planu orsamentu ba 2026, ba iha meta husi HNGV nian ne’e, ha’u labele mensiona nia númeru iha ne’e. Maibé, planu tau ona purvolta 200 até 300 pesoa hanesan ne’e. Maibé depende ba nesesidade no fazeadamente la’ós rekruta dala ida,” nia esplika.
Nia relata, rekrutamenta ba pesoál atu halo servisu no tenke bazeia ba méritu no espesialidade iha área ida-ne’ebé tenke rekruta ida mai atu servisu.
“HNGV nia orsamentu 2026 nian ne’e, Parlamentu Nasionál aprova millaun $20-resin, maibé ba rekrutamentu de’it. Ha’u labele esplika detallu iha ne’e tanba númeru ne’e seidauk loos, maibé ein-prinsipiu ba orsamentu ne’e iha,” nia dehan.
Jornalista : Felicidade Ximenes
Editór : Cancio Ximenes
