DILI, 13 Maiu 2026 (TATOLI)—Ministru Juventude, Desportu, Arte no Kultura (MJDAK), Nelyo Isaac Sarmento, kuarta ne’e, hasoru malu ho Prezidente Fundasaun TasiFest, Luis Manuel C. Simões, hodi ko’alia kona-ba preparasaun “Festival TT TasiFest” ne’ebé sei hala’o iha Tasi- Tolu, iha 29 Maiu 2026.
Notísia Relevante: Iwan Fals: Lenda moris múzika Indonézia nian sei anima povu Timor-Leste
“Ha’u fó agradesimentu ba TasiFest no deseja susesu ba imi-nia atividade, tanba involve mós grupu juventude sira, ne’e kapás tebes. Ha’u hein ita-boot sira-nia proposta mai lalais tanba imi-nia atividade mós besik ona,” Nelyo Isaac Sarmento hateten durante enkontru iha edifisu Lisidere Dili.
Nia dehan, MJDAK kontinua fó apoiu ba inisiativa sira-ne’ebé kria espasu ba talentu joven sira no hametin identidade kulturál iha rai-laran.
Ko’alia kona-ba Festival tinan ne’e mai ho tema “FESTIVAL TT TASIFEST” ne’ebé foka liu ba inovasaun no diversidade konteúdu.
Eventu ne’e la’ós de’it ba múzika, maibé inklui mós semináriu sira-ne’ebé envolve foinsa’e sira hamutuk ho organizasaun internasionál, setór privadu no kompañia sira.
Eventu referidu sei konta ho partisipasaun husi artista famozu sira hanesan Iwan Fals no Calema, hamutuk ho artista lokál sira.
Atividade ne’e viza hametin kapasitasaun juventude, sustentabilidade no dezenvolvimentu talentu iha Timor-Leste.
Notísia Relevante: 29-30 Maiu: CALEMA sei partisipa festivál datoluk iha Timor-Leste
Jornalista : Hortencio Sanchez
Editór : Cancio Ximenes
