DILI, 14 Maiu 2026 (TATOLI) – Institutu Jeosiénsia Timor-Leste (IGTL, sigla portugés) ezekuta ona, husi Janeiru to’o 11 Maiu, Orsamentu Jerál Estadu (OJE) 2026 hamutuk 41,6%, husi totál alokasaun $5.123.509.
Prezidente IGTL, Job Brites, esplika katak orsamentu ne’ebé aloka ba instituisaun ne’e destina ba Servisu Koorporativu hamutuk $4.109.785, Gabinete Prezidente $482.104, Kartografia no Jeolojia $218.180, Laboratóriu no Jeofízika $167.200, Idrojeolojia no Enjeñaria $146.240.
“To’o 11 Maiu ami konsege ezekuta $2.132.468. Osan ne’ebé seidauk ezekuta ne’e hamutuk $3.004.961,77”, Job Brites hateten ba Tatoli, ohin.
Nia esplika katak serbisu idrojeolojia no enjeñaria nian ne’e mak foka ba peskiza potensialidade bee-moos, identifika kontaminasaun, no avaliasaun risku rai nian antes halo konstrusaun.
Serbisu kona-ba laboratóriu no jeofízika ne’e mak atu dezenvolve fasilidade no apoia teste tékniku ba estudu jeolójiku, inklui análize amostra rai/pedra no peskiza jeofízika sira.
Servisu kartografia no jeolojia iha IGTL mak atu halo revizaun, kria, no renova mapa jeolójiku sira iha Timor-Leste. Unidade ida-ne’e halo peskiza kona-ba tipu fatuk, estrutura rai, no rekursu naturál sira hodi prodús dadus tékniku ne’ebé presiza ba dezenvolvimentu nasionál.
Tuir nia, serbisu sira ne’e hotu maski daudaun iha tempu udan, maibé instituisaun kontinua halo tanba hetan pedidu barak husi entidade oioin ne’ebé presiza asisténsia urjente.
Notísia relevante: IGTL prevee kada tinan rihun $300 hodi selu fatin aluger iha City 8
Jornalista: Arminda Fonseca
Editora: Maria Auxiliadora
