DILI, 14 Maiu 2026 (TATOLI) – TradeInvest Timor-Leste enkoraja setór privadu sira atu aproveita oportunidade Timor-Leste ne’ebé sai ona membru plenu ba Asosiasaun Nasaun Sudeste Aziátiku (ASEAN, sigla inglés), hodi halo investimentu ba área prioritária sira hanesan indústria manufatureira, agrikultura, peska no turizmu hodi kompete ho investidór internasionál sira.
Nia sujere ba setór privadu nomós investidór internasionál sira ne’ebé iha kapitál bele halo investimentu, tanba Governu kontinua kria ambiente favoravel hodi atrai investimentu no fasilita prosesu sira.
“Iha oportunidade sira-ne’e ami prontu apoiu ita-boot sira atu fasilita ita-boot sira-nia investimentu. Ita timoroan mós tenke foti ezemplu, ita timoroan mós tenke hatene investe. Agora la’ós de’it hein investidór estranjeiru sira”, Diretór-Ezekutivu TradeInvest, Duílio Marino Gusmão, hato’o liuhusi Programa Bainaka Kredivel edisaun datoluk, ne’ebé realiza iha Akait, Dili.
Duílio dehan esforsu sira ne’ebé TradeInvest halo mak serbisu hamutuk ho Kámara Komérsiu no Indústria Timor-Leste (CCI-TL), Sekretaria Estadu Formasaun Profisionál no Empregu (SEFOPE), Institutu Apoiu Dezenvolvimentu Emprezariál (IADE), no parseiru dezenvolvimentu sira hodi fó apoiu ba setór privadu.
Nia hateten Timor-Leste adere ona ba ASEAN no hanesan timoroan labele hein de’it investidór estranjeiru, maibé tenke iha inisiativa rasik hodi investe. Tanba desizaun investimentu ne’ebé boot sei ajuda kria postu traballu no fó impaktu pozitivu ba dezenvolvimentu ekonómiku nasionál.
Jornalista: Arminda Fonseca
Editora: Maria Auxiliadora
