BOBONARU, 15 Maiu 2026 (TATOLI) – Komunidade husu ba Institutu Jestaun Ekipamentu no Apoiu Dezenvolvimentu Infraestrutura (IGEADI) Brigada Maria Tapó atu halo normalizasaun ba estrada iha portaun aldeia Anahun, suku Odomau, postu administrativu Maliana, munisípiu Bobonaru, ne’ebé besik atu kotu tanba kauza husi udan-boot iha fulan hirak liubá.
Membru komunidade Odomau, Pedro Magalhães, dehan kondisaun atuál estrada ne’e hela de’it ona espasu ba transporte roda haat.
Notísia relevante: Administradór hato’o preokupasaun problema Estrada Maliana-Bobonaro ba MOP
“Udan mai beibeik, bee sobu, karreta tula todan mai sama beibeik bele kotu totál. Bee dalan ida uza gorong-gorong ne’e ida monu tiha hela de’it ona ida. Ami husu ba Estadu atu mai hadi’a tiha para ami bele ba mai ho di’ak”, nia dehan ba Tatoli, sesta-feira ne’e, tanba bainhira
Motorista Manuel Andrade Talo dehan sente ta’uk bainhira movimenta bá-mai tula sasán todan.
“Ami tula rai-henek ka simentu mak liu iha ne’e sempre haree di’ak mak foin bele liu, tanba ami ta’uk mak liu bá mak monu tiha. Agora, karreta hasoru malu ho motór de’it mós ladi’ak. Udan tan hanesan ne’e, rai-mamar ita sama loroloron bele monu neineik to’o kotu”, dehan.
Biban ne’e, Manuel Talo rekomenda ba Governu atu aselera prosesu aprovizionamentu ba projetu reabilitasaun estrada trosu Maliana Vila bá Bobonaru.
“Estrada ida-ne’e tinan-tinan ema hotu-hotu halerik, tanba udan ona grave loos, bee nakonu, tahu, rai-monu, dalan kotu, akontese oioin de’it. Lahatene bainhira loos mak atu halo karik? Ami povu hein ba hein to’o agora laiha rezultadu”, nia lamenta.
Antes ne’e, Administradór Postu Administrativu Bobobaru, Tomás Barreto, mós preokupa ho kondisaun estrada ne’e.
“Ohin viajen husi postu Bobonaru bá Maliana atu hakat liu sente labele, tun sei haree, tanba hau-nia postu Bobonaru mak uza barak liu estrada ne’e”, dehan.
Lembra katak, iha fulan-Abríl, Ministru Obra Públika, Samuel Marçal, informa katak estrada trosu Maliana bá Bobonaru iha ona faze dezeñu no Bill of Quantity (BoQ).
Notisía relevante: Komunidade ezije IGEADI ateru rai-mutin iha estrada Maliana-Bobonaro
Jornalista: Sergio da Cruz
Editora: Maria Auxiliadora
