BOBONARO, 22 novembru 2024 (TATOLI) – Komunidade sira ezije Ministériu Obra Públika, orienta Institutu Jestaun Ekipamentu Apoia Dezembolvimentu Infrastrutura, Institutu Públiku (IGEADI,IP) Brigada Maria-Tapo, emerjensiamente atu ateru raihenek-mutin ba iha estrada ligasaun husi suku Lahomea, postu administrativu Maliana ba to’o suku Oe-leu, postu administrativu Bobonaro, munisípiu Bobonaro, hodi fasilita movimentasaun publiku tanba hafoin udan durante ne’e kondisaun estrada nakonu ho bee-nalihun no tahu-dodok.
Antes ne’e Administradór postu administrativu Bobonaro, Tomas Barreto Henriques, submete ona pedidu ba IGEADI,IP atu halo intervensaun emerjénsia ba estrada hahú husi Ili-Bole ba to’o Karabau.
Komunidade Paulino de Jesus Morais, esplika, kondisaun estrada ne’e difikulta tebes komunidade sira atu halo movimentu ho transporte karreta no motorizada.
Notísia relevante: APA Bobonaro submete ona pedidu ba IGEADI normaliza estrada Oe-leu to’o Hauba
“Ami hanesan povu triste, tanba ita ukun-an tinan barak ona, estrada ida ne’e mak aat nafatin de’it, mudansa laiha liu, agora ita hotu, boot sira mós bele mai haree ho matan, udan hanesan estrada laran kolam-oan mak barak loos, ita liu ba mai mós ladiak, ne’ebé ami husu ba IGEADI atu fakar netik rai-mutin nune’e udan ba mós ita bele liu di’ak, se lae ita hanesan liu fali husi mota laran, tanba komesa husi Oe-leu tun mai Lahomea ne’e koak-aat hotu de’it ne’e,” nia informa ba TATOLI, iha Gruta Lahomea, kinta ne’e.
Tuir nia, estrada ne’e difikulta mós komunidade sira atu lori produ lokál asesu ba merkadu liuliu atu transporte pasiente ho emerjénsia ba Hospital Referál Maliana.
“Ita moras bainbain ne’e sei di’ak oituan, mas inan isin-rua atu partu labarik bele moris iha dalan, di’ak ka mate ita lahetene, depois katuas ferik sira moras todan mak mai ne’e hein iis kotu de’it ona, tanba tún ba ne’e dalan tatidik hotu de’it ne’e,” nia akresenta.
Americo Andrade, nu’udar motorista kamioneta ne’ebé durante ne’e sempre liu iha estrada referida observa katak kondisaun atuál la permite ona atu fasilita movimentasaun transporte públiku no privada, tanba kondisaun fízika kuaze aat totál.
“Kuandu bailoro ami la tudan sasán todan sa’e araska, mas udan fali tula todan mak araska liu fali, sama rai tún liu ba okos, ha’u sente araska liu ne’e parte Ilibole ponte nia ne’e, ho ida atu sa’e ba Oe-leu ne’e. Ida-ne’e ami povu husu ba ita-nia Governu sé bele tau-matan ba,” nia husu.
Enkuantu estrada ne’e liga mós ba postu administrativu Lolotoe, munisípiu Bobonaro no postu administrativu Atsabe, munisípiu Ermera inklui munisípiu Covalima.
Notísia relevante: Prezidente Repúblika ‘sasin’ ba promesa MOP hadi’a estrada Bobonaro-Lolotoe
Jornalista: Sérgio da Cruz
Editór: Evaristo Soares Martins
