BOBONARO, 15 novembru 2024 (TATOLI) – Administradór Postu Administrativu (APA) Bobonaro, Munisípiu Bobonaro, Tomás Barreto Henriques, submete ona pedidu ba Prezidente Konsellu Administrasaun Institutu Jestaun Ekipamentu Apoia Dezembolvimentu Infrastrutura, Institutu Públiku (IGEADI,IP) atu orienta Brigada Maria-Tapo mobiliza ekipamentu pezadu hodi halo normalizasaun ba estrada husi área Ili-Bole, suku Oe-leu ba to’o Hauba, suku Kolimau.
Líder másimu postu administrativu Bobonaro hato’o pedidu ne’e tanba faktu hatudu kondisaun estrada husi Oe-leu ba to’o Hauba aat grave, tanba konstrui desde tempu okupasaun Indonézia to’o agora Governu seidauk tau atensaun.
Notísia relevante: Estrada iha Oe-leu haterus komunidade viajen Maliana-Bobonaro
“Pedidu ninia arkivu mós iha, ha’u dirije direita ba Prezidente IGEADI,IP, ha’u hasoru direita vokál IGEADI nian, depois ha’u ba mós Ministériu Obra Públika no ba mós Prezidente Komisaun F trata asuntu Infraestrutura, oinsá mak sira bele iha kolaborasaun atu halo normalizasaun emerjénsia, ha’u-nia proposta ne’e tau imajen kompletu, fatin ne’ebé risku hanesan Ili-Bole, ita hasai tiha manila entaun bee-nalihun sobu tiha, depois ida sa’e ba Ili-Bole ne’e mós ha’u husu dehan tenke tau rai henek-mutin,” nia informa ba TATOLI, iha kna’ar fatin, sesta ne’e.
Nia dehan, hafoin submete pedidu nia parte mós kontinua halo kontaktu ba dirijente IGEADI,IP, maibé resposta katak seidauk bele responde tanba kestaun orsamentu.
“Ida-ne’e ha’u preokupa loos, ha’u dehan ba Prezidente IGEADI,IP, ita-nia povu ne’e presiza loos asesu estrada atu nune’e sira bele lori produtu lokál ba merkadu ne’e importante, tanba ita haree kondisaun estrada ne’e grave,” nia hakotu.
Kona-ba atu halo reablitasaun, nia parte hasoru malu ona ho Ministru Obra Públika, Samuel Marçal, katak estrada husi Oe-leu ba to’o Leber no Oe-leu liga ba to’o Lepo tama ona iha planu orsamentu tinan 2025.
Sorin seluk Komunidade Bobonaro, Filipe Monteiro, husu ba IGEADI,IP atu konsidera proposta ne’e molok udan monu rai.
Nia husu MOP atu aselera prosesu ba projetu reabilitasaun, tanba kondisaun estrada atuál difikulta tebes movimentasaun públiku.
“Ami-nia estrada ne’e bailoro ita konta ba sei di’ak, rai-rahun ho tatidik de’it, mas udan, husi Maliana sa’e mai Oeleu, depois ba to’o Kolimau, Lepo sira-ne’e hanesan mota hotu, tanba bee nalihun, estrada laran sira tahu-dodok mak nakonu,” nia informa.
Enkuantu estrada ne’e liga mós ba munisípiu Covalima no Ermera.
Tuir dadus monografia autoridade munisípiu Bobonaro tinan 2024 postu administrativu Bobonaro iha aldeia 63, suku 18 ho totál populasaun 23,376 xefe família 4,601.
Notísia relevante: Komunidade triste ho kondisaun estrada Oe-leu
Jornalista: Sérgio da Cruz
Editór: Evaristo Soares Martins
