VIKEKE, 16 Maiu 2026 (TATOLI)—Empreza Bere is Back hetan ona orientasaun husi Servisu Ministériu Obra Públika (MOP) Munisípiu Vikeke hodi normaliza Ponte Vessoru, Postu Administrativu Uatulari, ne’ebé hetan estragu husi mota nune’e ponte kuaze kotu.
Diretór Empreza Bere Is Back, Luís Bernardo Gamboa, haktuir, horisehik simu orientasaun husi MOP Munisípiu Vikeke, depois empreza dezloka kedas ekipamentu pezadu kompostu husu eskavatór no karreta fuzu hodi hahú serbisu desde horikalan to’o ohin ramata.
“Ponte ne’e besik kotu, kauza husi mota boot tun iha semana ne’e hodi fó impaktu ba ponte rai monu no atu kotu husi parte Suku Vessoru, inklui bá fali Postu Uatukarbau nian. Ami aterru di’ak fali ona,” Diretór Empreza informa ba Ajénsia TATOLI iha Postu Uatulari, Sábadu ne’e.
Notísia relevante : Ponte Metauai Uatucarbau kotu difikulta movimentu ema no transporte
Nia dehan, daudaun ne’e movimentu transporte públiku sira hahú la’o filafali tanba empreza halo nomalizasaun ponte ne’ebé liga bá Postu Uatukarbau.
“Agora ami normaliza hotu ona, hein de’it orentasaun husi MOP karik iha tan ami prontu normaliza. Iha parte Vessoru ponte ki’ik ida tan mak mota estraga,” nia akresenta.
Nia dehan, ho normalizasaun ne’e bele fasilita mobilizasaun transporte sira husi Postu Uatukarbau bá Munisípiu Vikeke, inklui movimentu husi Postu Uatulari halo viajen bá Postu Uatukarbau.
Entretantu, Ponte Vessoru ne’e rai monu metru ida hafoin empreza halo normaliza ho fatuk no rai henek hodi taka fali rai ne’ebé besik ponte monu.
Jornalista : Vitorino Lopes da Costa
Editora : Julia Chatarina
