DILI, 18 Maiu 2026 (TATOLI)—Autoridade Inspesaun Fiskalizasaun Atividade Ekonómika no Sanitária Alimentár (AIFAESA, sigla portugés), Segunda ne’e, realiza workshop kona-ba aihán seguru ba operadór ekonómiku iha áre komérsiu ho objetivu atu minimiza risku saúde públiku ba konsumidór sira.
Notísia Relevante: Janeiru-Setembru, AIFAESA halo inspesaun ba operadór ekonómiku 3088
Inspetora Jerál Autoridade Inspesaun Fiskalizasaun Atividade Ekonómika no Sanitária Alimentár (AIFAESA, sigla portugés), Odete Viegas, hateten atividade ne’e hetan konfiansa husi Governu Amérika liuhusi Embaixada Amérika iha Timor-Leste, nune’e iha timoroan na’in-40 husi operadór komérsiu liuliu área nutrisaun hanesan ema hirak ne’ebé prepara aihán ba konsumidór sira iha restaurante, ospitál no faan hahán iha dalan ninin.
“Ida-ne’e oportunidade di’ak ba ema sira-ne’ebé hakarak halo negósiu liuliu prepara hahan, nune’e iha futuru sira bele sai nutrisionista ne’ebé di’ak-liu ho saudavel atu labele fó tan risku ba saúde públiku,” Inspetora ne’e informa ba jornalista sira iha edifísiu AIFAESA, Matadoru.
Nia konsidera, kapasitasaun rekursu umanu nia koñesimentu ne’e importante, atu nune’e bele sai servidór ne’ebé di’ak-liu ba komunidade no konsumidór sira.
“Tanba durante ne’e tuir sira-nia haree, negosiante sira halo iha kondisaun mínima tanba sira laiha finanseiru ne’ebé sufisiente atu fó atendimentu ka servente ne’ebé di’ak. Maske sira buka osan mós ba sira-nia nesesidade, entaun sira tenke uza kondisaun ne’ebé iha liuliu prepara hahan ne’ebé di’ak,” nia dehan.
Nia hatutan, AIFAESA sei kontinua halo advokásia ba operadór ekonómiku sira-ne’ebé kiik ne’e, signifika la’ós sai inimigu maibé sai parseriu hodi tulun sira hadi’a kondisaun negósiu.
Enkuantu atividade workshop ne’e hahú durante loron rua hahú husi loron segunda (18 Maiu) to’o tersa (19 maiu), no formadór sira husi timoroan ne’ebé antes ne’e tuir formasaun food safety iha Amérika.
Aleinde ne’e, nia infroma, atividade inspesaun ba trimestre daruak nian ne’e AIFAESA kontinua halo iha munisípiu sira hanesan Ermera, Likisa, Baukau no Vikeke, no sira mós sei espanda tan inspesaun ba munisípiu sira seluk iha Timor-Leste.
Jornalista : Alexandra da Costa
Editór : Cancio Ximenes
