KOVALIMA, 18 Maiu 2026 (TATOLI)- Autoridade Munisípiu Kovalima liuhusi Servisu Munisipál Jestaun Risku Dezastre Naturál fó apoiu emerjénsia ba uma-kain 28 afeitadu ba dezastre naturvál ho tipu inundasaun iha Aldeia Kulu-oan, Suku Tashilin, postu Administrativu Zumalai, Munisípiu Kovalima.
“Ami fó apoiu emerjénsia ba uma-kain 28 ne’ebé afeitadu husi dezastre naturcl hanesan inundasaun iha suku Tashilin. Molok atu fó apoiu ami hamutuk ho xefe Aldeia halo identifikasaun hodi halo dokumentasaun ami fó apoiu bazeia ba dadus identifikasaun”, Diretór Servisu Munisipál Jestaun Risku Dezastre Naturál, João Martins hato’o iha Tashilin.
Apoiu emerjénsia ne’e hanesan lona, biti, foos, supermie, Mina Sona, susu been no sira seluk tan.
Iha fatin hanesan, Familia afetadu inundasaun husi Suku Tashilin, Agapito da Costa, dehan nia parte hetan apoiu emerjénsia tanba iha tempu-udan hodi estraga sasan uma laran inklui ho animál.
“Ami hetan apoia relasiona udan-boot ne’ebé akontese iha Kovalima hodi estraga, ami nia sasan uma-laran animál sira hanesan fahi-manu no estraga mós sasan uma-laran tanba ne’e ami kontente, nune’e bele hakmaan ami,” nia dehan.
Família afetadu husu ba Governu atu halo normalizasaun tanba kada mota tuun hodi afeita ba komunidade sira.
Jornalista:Celestina Teles
Editór: Florencio Miranda Ximenes
