Embaixadór Angola : TL hatudu reziliénsia durante tinan 24 Restaurasaun Independénsia
DILI, 18 Maiu 2026 (TATOLI) — Embaixadór Angola ba Timor-Leste, José Andrade de Lemos, konsidera katak Timor-Leste hatudu reziliénsia no dezenvolvimentu pozitivu durante tinan 24 hafoin Restaurasaun Independénsia iha 2002.
Deklarasaun ne’e hato’o husi Embaixadór José Andrade de Lemos ba TATOLI iha refleksaun kona-ba komemorasaun tinan 24 Restaurasaun Independénsia Timor-Leste ne’ebé ho tema “Hamutuk ita sei harii pátria ida ne’ebé justa, inkluziva no reziliente liután”.
Tuir nia haree, progresu Timor-Leste atualmente bele haree husi esforsu Estadu nian atu preserva istória luta povu nian no prepara futuru dezenvolvimentu nasionál ida ne’ebé forte liu.
“Timor-Leste merese hetan parabéns tanba bele preserva memória pasadu, hala’o tempu agora no prepara ba futuru,” dehan José Andrade de Lemos ba TATOLI, Segunda ne’e.
Nia dehan tama Timor-Leste ba membru ASEAN sei sai pasu importante ida ne’ebé loke oportunidade foun ba aselerasaun dezenvolvimentu nasionál iha setór oioin.
“Ho entrada Timor-Leste ba ASEAN, ida ne’e sei lori avansu foun ba dezenvolvimentu nasaun nian,” nia hateten.
Aleinde ne’e, Embaixadór Angola mos hato’o mensajen ba povu Timor-Leste tomak atu kontinua mantein espíritu luta, korajen no rezisténsia hodi enfrenta dezafiu dezenvolvimentu.
“Ba povu Timor-Leste tomak ne’ebé kontinua hatudu reziliénsia, korajen no forsa, keta haluha istória luta povu nian. Onra boot ba Timor-Leste bele sai nasaun ida ne’ebé prosperu,” dehan nia.
Relasaun diplomátika entre Angola no Timor-Leste iha istória naruk ida ne’ebé hahú desde tempu koloniál Portugés, bainhira nasaun rua ne’e hela iha ukun Portugál nian.
Iha istória luta independénsia Timor-Leste nian, Angola tama ba nasaun 12 primeiru ne’ebé rekoñese independénsia Timor-Leste depois deklara unilateralmente husi FRETILIN iha 28 Novembru 1975.
Aleinde fó apoiu diplomátiku no polítiku, Angola mos sai hanesan fatin ba timor-oan balu ne’ebé hetan asilamentu durante tempu okupasaun Indonézia.
Atualmente, nasaun rua ne’e kontinua fortalese kooperasaun iha área defeza, seguransa, edukasaun, saúde, petróleu no gás, no agrikultura liuhusi inisiativa bilateral no kooperasaun iha kuadru Comunidade dos Países de Língua Portuguesa (CPLP).
Iha 06 Maiu 2025, Angola ofisialmente loke nia embaixada iha Dili, ne’ebé sai embaixada primeiru husi nasaun Afrikanu ida iha Timor-Leste.
Jornalista : Cidalia Fátima
Editora : Armandina Moniz
