DILI, 18 Maiu 2026 (TATOLI)—Onkolojista iha Hospital Nacional Guido Valadares (HNGV), João Teodosio Amaral, husu ba públiku ein jerál atu evita han hahán sira ne’ebé mak importadu nune’e labele hamosu moras kankru.
“Husu ema hotu atu evita han hahán sira ne’ebé mak importadu hanesan na’an sira, nune’e labele hamosu moras kankru sira, tanba hahán importadu sira ne’e atu konserva produtu kímiku sira no bele sai hanesan kauza ba moras kankru,” Médiku João Teodosio informa iha ninia knaar fatin, HNGV, Segunda ne’e.
Biban ne’e, nia husu mós sidadaun sira atu halo ezersísiu tanba dalabarak ema lakohi halo ezersísiu fíziku ne’e mós sai fatór ida hodi hamosu moras kankru.
“Ida tan mak barak konsumu alkool, fuma ida-ne’e mós sai fatór risku ne’ebé bele hamosu moras kankru, maibé ida-ne’e ita bele modifika tanba sigaru ita bele para fuma, maibé iha fatór risku ne’ebé mak ita labele modifika ezemplu mak fatór jenétiku,” nia akresenta.
Notísia relevante : Pasiente kankru raan na’in-17 hala’o tratamentu ativu iha Klínika Bairru Pite
Sentru Onkolojia mós rejista kankru prostata hamutuk 18, husi ne’e sintomas prinsipál mai husi sistema reprodutivu ka urináriu mane nian.
“Ninia sinais sintomas prinsipál mak bainhira mane ida hahú sente problema soe bee kiik, dalaruma bá soe bee kiik la hotu no sente moras no bá haris fatin bebeik, maibe mii oituan de’it, kankru prostata ne’e afeta ba idade 65 ba leten, entaun moras ne’e afeta ba mane sira ho idade avanzadu,” nia esplika.
Jornalista : Felicidade Ximenes
Editora : Julia Chatarina
