DILI, 19 Maiu 2026 (TATOLI) — Embaixadór Emiradus Árabes Unidus (EAU) ba Indonézia no Timor-Leste, Abdulla Salem Al Dhaheri halo vizita ofisiál dahuluk ba Ajénsia Notisioza TATOLI, I.P iha Dili, tersa ne’e, hodi hametin relasaun media no enkoraja kooperasaun troka informasaun entre ajénsia notisioza nasional rua ne’e.
Iha enkontru refere, Embaixadór Abdulla Salem Al Dhaheri hatete katak parte rua diskute kona-ba oportunidade kooperasaun entre ajénsia notisioza nasional Timor-Leste no Emiradus Árabes Unidus (EAU) hodi melhora liu tan fluxo informasaun ne’ebé di’ak no konfiável.
“Ami koalia kona-ba área sira ne’ebé bele halo envolvimentu no koordinasaun entre ajénsia nasional rua, hodi bele iha fluxo informasaun ne’ebé di’ak liu. Ajénsia rua ne’e konsidera nu’udar fonte informasaun ne’ebé kredível no respeitadu, tanba ne’e ami hakarak aproveita kooperasaun ida-ne’e,” hatete Embaixadór Abdulla Salem Al Dhaheri ba TATOLI hafoin enkontru ne’ebe hala’o iha Farol, Dili.
Nia hateten mós katak diskusaun refere inklui maneira atu hametin relasaun entre Embaixada EAU iha Jakarta ho TATOLI, hodi bele troka informasaun ne’ebé konfiável liu tan iha tempu ne’ebé informasaun falsu espalla barak iha sosiedade.
“Ami hakarak hametin relasaun entre Embaixada EAU iha Jakarta no TATOLI atu fluxo informasaun entre parte rua bele sai konfiável liu tan. Informasaun falsu sempre iha, tanba ne’e parte rua tenke sai fonte informasaun ne’ebé kredível no bele depende malu,” dehan Nia.
Iha parte seluk, Prezidente Konsellu Diretiva TATOLI, Noémio Mateus Soares Falcão, hatete sente orgullu tebes ho vizita ofisiál husi Embaixadór EAU tanba durante ne’e Embaixada EAU ne’ebé rezidensia iha Jakarta kontinua akompaña publikasaun TATOLI sira.
Noémio hatete katak Embaixadór mós iha planu atu liga TATOLI ho ajénsia notisioza oficial EAU nian atu bele harii kooperasaun media ne’ebé di’ak liu iha futuru.
“Nia hatete katak ajénsia notisioza importante tebes atu fó sai informasaun kona-ba relasaun bilateral entre nasaun rua. Relasaun entre lider sira husi Timor-Leste no EAU mós di’ak tebes, tanba ne’e media tenke hola parte atu promove relasaun ida-ne’e atu bele lao di’ak iha futuru,” dehan Noémio.
Nia aumenta tan katak diskusaun ida-ne’e sai hanesan hahú prosesu kooperasaun ida ne’ebé sei lori ba akordu ofisiál entre ajénsia notisioza rua.
“Ida ne’e inisiu kooperasaun ida ne’ebé ami sei lori ba akordu ida. Embaixadór rasik sei akompaña prosesu ida-ne’e atu bele iha kooperasaun entre ajénsia notisioza rua,” nia dehan.
Nu’udar parte husi planu kooperasaun refere, TATOLI bele harii relasaun ho Emirates News Agency (WAM), ajénsia notisioza oficial Emiradus Árabes Unidus ne’ebé durante ne’e sai fonte prinsipál ba disseminasaun informasaun nasional no internasionál iha nasaun refere.
Jornalista : Cidalia Fátima
Editora : Armandina Moniz
