KOVALIMA, 20 Maiu 2026 (TATOLI)- Reperzentante husi World Vision Nova- Zelándia hamutuk ho World Vision Timor-Leste observa hodi rona direta progresu no dezafiu Kooperativa Solidariedade Kovalima (SOLVOC) ne’ebé lokaliza iha suku Matai, Postu Administrativu Maucatar, Munisípiu Kovalima.
Objetivu prinsipál hala’o vizita ida-ne’e, atu hatene kle’an implementasaun atividade ne’ebé World Vision oferese ona ba kooperativa SOLVOC durante tinan-ida nia laran.
“Vizita ne’e hodi rona progresu no dezafiu sira ne’ebé grupu sira ne’ebé hasoru, ami mós hakarak hatene sira-nia mehi ba futuru tanba ne’e mak World Vision husi Nova-Zelándia hakarak vizita atu mai hatene direta”, Jerente World Vision iha Timor-Leste, João Moniz, dehan ba Jornalista sira suku Matai.
World Vision durante ne’e fó apoiu ba grupu kooperativa SOLCOV liuhosi projetu Brass mak fasilita formasaun finanseiru foku ba Administrativa finanseiru no apoiu livru no kaixa rai osan.
Apoia ne’e ho baze ba World Vision nia servisu hamutuk ho Sekretáriu Estadu Kooperativa (SEKOOP) hodi fasilita treinamentu ba esrutura sira kona-bá sistema finanseira hodi hasa’e grupu sira-nia koñesementu. Alende ne’e, apoia mós iha kooperasaun di’ak ho administratór postu no autoridade lokál hodi haree grupu sira espera sira bele la’o ho di’ak no hamriik mesak iha futuru.
Iha fatin hanesan, Fundadór Kooperativa SOLCOV iha suku Matai, Rosa Duarte sente kontente tanba hetan vizita hosi World Vision Nova-zelandia no World Vision Timor-Leste.
“Iha Kooperativa ne’e ami mesak feto, uluk ami hatene de’it mak rai no impresta osan, maibé ho World Vision hasa’e ami nia koñesementu entaun ami alarga tan envolve iha agrikutura hanesan transforma ai-han lokál ba modernu hafoin ami faan no nia rezultadu osan ne’e ami rai iha kooperativa”, nia agradese.
Membru Grupu ne’ebé mak envolve iha setór agrikultura hodi transforma ai-han lokal ba modernu tanba hetan suporta materiál husi Word Vision. Tuir dadus katak Grupu SALCOV ne’ebé lokaliza iha Suku Matai, ho nia membru grupu hamutuk 194.
Jornalista: Celestina Teles
Editór : Florencio Miranda Ximenes
