DILI, 20 Maiu 2026 (TATOLI)—Prezidente Repúblika, José Ramos-Horta, kuarta ne’e, prezide serimónia lansamentu ba konstrusaun Rezidénsia Estudantil Feminina ne’ebé apoia husi Prezidente Emiradu Árabe Unidu, Alteza Sheikh Mohamed bin Zayed Al Nahyan, ho objetivu atu promove no hasa’e asesu ba edukasaun ba joven feto timoroan sira husi família vulnerável no ho rekursu limitadu.
Prezidente Ramos-Horta hateten, rezidénsia ne’e dezeña hanesan instalasaun modernu ida-ne’ebé inkorpora solusaun teknolójika no ambientál sira-ne’ebé avansadu, inklui enerjia solár 100%, sistema rekolla no tratamentu udan-been, resiklajen bee-fo’er no prinsípiu ekonomia sirkulár.
“Ohin hanesan loron esperansa no momentu ba oin ba feto foinsa’e sira Timor-Leste nian. Edukasaun mak arma ne’ebé poderozu liu atu muda mundu,. Ba ita-nia oan-feto sira atu hetan susesu, sira tenke aprende iha seguransa no dignidade. Ha’u hato’o ha’u-nia agradesimentu kle’an ba ha’u-nia belun, Prezidente Sheikh Mohamed bin Zayed Al Nahyan, ba ninia vizaun laran-luak,” Ramos-Horta hateten iha nia diskursu iha Palásiu Prezidensiál Nicolau Lobato, Bairru Pite.
Nia hatutan, lansamentu fatuk dahuluk ida-ne’e la’ós de’it inisiu husi konstrusaun fízika ida-ne’e mak materializasaun ba promesa ida-ne’ebé halo ba estudante feto timoroan sira.
“Promesa ida katak feto foinsa’e ida-idak, la haree ba nia orijin sosiál, sei iha asesu ba edukasaun, dignidade, no oportunidade atu harii nia futuru. Hein katak rezidénsia ida-ne’e hamriik nu’udar símbolu ida ba esperansa, amizade entre povu no kompromisu ba jerasaun sira iha futuru,” Horta tenik.
Xefe Estadu ne’e dehan, kompleksu ne’e sei inklui mós biblioteka ida, sala estudu, sala han nian, klínika ida, no espasu verde sira, hodi forma ambiente komprensivu ida-ne’ebé apoia dezenvolvimentu umanu no akadémiku.
“Hein atu ramata iha tinan 2027, edifísiu ne’e ho intensaun atu serve hanesan modelu referénsia ba futuru projetu infraestrutura públika sira iha Timor-Leste, partikularmente sira ne’ebé ho objetivu ba auto-sufisiénsia no sustentabilidade ambientál,” nia hateten.
Embaixadór EAU, Abdulla Salem Al Dhaheri, iha ninia diskursu hateten apoiu ne’e mai husi lider boot EAU nian hodi hametin kooperasaun no apoiu Timor-Leste nia dezenvolvimentu iha área edukasaun.
“Inisiativa signifikativu ida-ne’e mai husi orientasaun no apoiu jenerozu husi Sua Alteza Sheikh Mohamed bin Zayed Al Nahyan, Prezidente Emiradu Árabe Unidu, ne’ebé nia lideransa vizionáriu kontinua tau importánsia boot ba apoiu dezenvolvimentu sustentável, edukasaun no kooperasaun umanitária iha mundu tomak,” Embaixadór ne’e dehan.
Nia afirma, serimónia ne’e reprezenta faze istóriku ida tan iha relasaun entre EAU no Timor-Leste, refleta nasaun rua (2) nia kompromisu hamutuk atu hametin kooperasaun iha área dezenvolvimentu, edukasaun no parseria umanitária.
Serimónia ne’e marka pasu signifikativu ida iha amizade bilaterál entre Timor-Leste no Emiradu Árabe Unidu, hodi reforsa kompromisu kompartilladu hodi empoderamentu labarik-feto sira liuhusi infraestrutura edukasionál ne’ebé seguru no ho kualidade aas.
Pontu prinsipál husi eventu ne’e mak asinatura Nota Entendimentu (MoU) entre Ministru Negósiu Estranjeiru no Kooperasaun (MNEK), Bendito dos Santos Freitas, no Embaixadór Estraordináriu no Plenipotensiáriu Emiradu Árabe Unidu nian, Abdulla Salem Al Dhaheri. Akordu ne’e testemuña husi Prezidente Ramos-Horta no Primeiru-Ministru Kay Rala Xanana Gusmão.
Hafoin asinatura, CEO Areem Plus, Rajeev Mangottil, hato’o aprezentasaun detallu ida kona-ba planu projetu nian. Aprezentasaun ne’e tuir kedas ho serimónia lansamentu primeira pedra ne’ebé lidera husi Prezidente Ramos-Horta, MNEK Bendito Freitas no Embaixadór Abdulla Salem Al Dhaheri.
Serimónia lansamentu primeira pedra ida-ne’e partisipa mós husi Vise Primeiru-Ministru Austrália nian, Hon. Richard Marles, Eis Ministru Negósiu Estranjeirus Repúblika Indonézia nian na’in Rua, Hassan Wirajuda no Marty Natalegawa, Vise-Ministra Negósius Estranjeirus no Kooperasaun, Jesuína Maria Ferreira Gomes, Korpu Diplomátiku no ofisiál sira husi Governu.
Rezidénsia ba Estudantil Feminina sei fornese akomodasaun ne’ebé seguru no fó apoiu ba estudante sira-ne’ebé hala’o sira-nia estudu iha Dili, hodi ajuda hasai barreira prinsipál ida ba kontinuasaun edukasaun ba feto foin-sa’e sira husi nasaun laran tomak.
Projetu ne’e tuir envolvimentu kontinua entre Prezidénsia, Governu, no parseiru sira iha EÁU, ne’ebé reflete kompromisu hamutuk hodi investe iha edukasaun no hakbiit Timor-Leste nia lideransa jerasaun foun sira tuir mai.
Jornalista : Hortêncio Sanchez
Editór : Cancio Ximenes
