DILI, 20 Maiu 2026 (TATOLI)—Prezidente Repúblika, José Ramos-Horta, parabeniza Governu ne’ebé hatudu progresu reforsu soberania enerjétika.
“Ha’u fó parabéns ba Governu kona-ba progresu ne’ebé alkansa ona iha reforsu soberania enerjétika, liuliu liuhusi avansu projetu prospesaun, lisensiamentu no negosiasaun iha bloku petrolíferu offshore no onshore ne’ebé tuir jurisdisaun nasionál,” Ramos-Horta hateten iha nia diskursu durante komemorasaun tinan 24 restaurasaun independensia, ne’ebé realiza iha Tasi-Tolu, ohin.
Nia dehan, kontestu ida-ne’e destaka dezenvolvimentu Kampu Greater Sunrise nian, ne’ebé nia estudu konseptuál independente (ne’ebé konkuídu entre finál 2024 no inísiu 2025) husi Ajénsia Consultadoria Wood nian, rekomenda opsaun viável no lukrativu liu, ba Austrália no ba Timor-Leste, konstrusaun gazodutu ida ba Kosta-Súl Timor-Leste nian.
Nia hatutan, rejista mós progresu iha bloku sira hanesan Kuda Tasi, Jahal no Chuditch, no-mós iha esplorasaun onshore, hodi asegura reseita atuál sira no prepara futuru enerjétiku país nian.
Entretantu, iha setór mineiru, observa tranzisaun progresiva ida husi esplorasaun artezanál ba abordajen ida ne’ebé estruturada liu, ho énfaze partikulár ba dezenvolvimentu fileira mármore iha Manatutu no ninia promosaun internasionál.
Esforsu diversifikasaun minerál sira mós hala’o daudaun, inklui manganés, kobre, osan-mean, osan-mutin, rai sira ne’ebé raru no rekursu estratéjiku sira seluk.
Prosesu ida-ne’e akompaña ona ho reforsu institusionál, inklui kriasaun Companhia Mineira Nacional Murak Rai Timor, E.P., hodi asegura partisipasaun boot liu hosi Estadu no sustentabilidade.
Jornalista : Hortêncio Sanchez
Editór : Cancio Ximenes
