BOBONARU, 21 Maiu 2026 (TATOLI)-Xefe Suku Lour, postu administrativu Bobonaru, munisípiu Bobonaru, Miguel Gomes Lopes, preokupa tanba durante tinan 24 ukun-an komunidade iha aldeia Galitas, Olo-olo no Helikei balun kontinua hela iha nakukun laran.
Nia relata katak aldeia Tasgolo mak asesu ona eletrisidade no falta uma-kain 100-resin iha aldeia tolu ne’e mak seidauk asesu eletrisidade, ne’ebé dadaun ne’e sunu de’it lampariña no painél solár.
“Ha’u kestiona beibeik, tanba suku Lour hanesan suku rezisténsia ne’ebé kontribui ba ukun-an ida-ne’e. Maibé, iha aldeia tolu to’o agora seidauk asesu eletrisidade”, nia lamenta.
Líder komunitáriu ne’e hato’o ona proposta ba Ministériu Obra Públika (MOP), maibé to’o agora seidauk iha resposta pozitiva.
Notísia relevante: Simu Krúz Joven Internasionál, Bombeiru-EDTL Bobonaru sei tesi ai-sanak iha estrada-ninin
“Ha’u-nia proposta ne’e sira tau iha ne’ebé mós la hatene, keta halo tau fali iha lixu. Governu laiha seriedade atu rezolve problema eletrisidade, tanba independénsia to’o agora povu sira iha suku viziñu asesu hotu ona eletrisidade, aldeia tolu iha Lour mak sei halerik nafatin”, nia hato’o.
Ba kestaun ne’e, Xefe Unidade EDTL Munisípiu Bobonaru, Mário de Jesus Soares, dehan aldeia tolu ne’e tama ona prioridade iha tinan ida-ne’e. “Ita halo hotu ona levantamentu dadus, semana oin tan ita bele halo ona Site Visited bá Lour. Tinan ida-ne’e ita bele implementa ona obra ne’e”, nia informa.
Suku Lour iha aldeia Helikei no Galitas iha poténsia ba Gás, no setór agrikultura. Komunidade kuda batar, fehuk, liis, lakeru, hudi, ai-farina no ai-han sira seluk tan.
Suku ne’e mós iha poténsia ba área turizmu tanba iha foho ida naran Gunung Meza, neʼebé uluk 1999 sai mós fatin konsentrasaun populasaun postu administrativu Bobonaru no Zumalai hodi helik an husi inimigu.
Suku Lour iha aldeia haat mak hanesan Helikei, Galitas, no aldeia Tasvolo, ho totál populasaun 1.300-resin no xefe família 300-resin.
Notísia relevante: EDTL orienta instala liña eletrisidade ba aldeia sira iha Bobonaro
Jornalista: Sergio da Cruz
Editora: Maria Auxiliadora
