DILI, 21 Maiu 2026 (TATOLI)—Ekipa matak Malirin ho naran idéntiku Karketu Dili FC, susesu iha nia jornada dahuluk hodi rekolla pontu tolu (3) dahuluk iha Liga Futeból Timor-Leste (LFTL) Primeira Divizaun époka 2026.
Karketu goza nia vitória dahuluk ne’e bainhira manán adversáriu AS Marca FC ho rezultadu 4-2, iha jogu abertura LFTL époka 2026, iha ne’ebé jogu realiza iha Estádiu Munisipál Dili, kinta kalan. Jogu entre ekipa rua (2) lidera husi árbitru prinsipál, Bernardinho Mascarinhas, juiz liña Gabriel Xavier, Henrique Pereira no árbitru rezerva Fernando do Rego.
Hanesan baibain iha kultura futeból kampo boot, ekipa rua hahú jogu árbitru fó orden liuhusi huu aŕbitu no jogu la’o kedan. Bainhira jogu la’o iha kampo matak nia leten, ekipa rua lansa kedan kontra no atake ba malu tuir tékniku no abilidade ekipa ida-idak nian.
Jogu ho objetivu ida, jogu ho hakarak ida, tenke rekolla vitória ho pontu tolu iha ema lubun ba lubun nia matan ne’ebé tur nahe-an iha Estádiu Munisipál Dili ne’ebé mai ho lian oioin, forsa Karketu, .forsa AS Marca, husi lian laek hirak ne’e apoiu tebes jogadór sira.
Marca nia adeptu nia hakilar la hela de’it hanesan hakilar, fó kontente duni jogadór sira, duelu entre Karketu, Marca la’o hanesan funu kiik iha kampo laran. Marca liuhusi nia treinadór José Fonseca orienta jogadór sira atu halo jogu ofensivu no kontra atake makas ba oin, ikus iha minutu ‘6, jogadór Ezaquel da Cruz (11) lansa ona golu dahuluk hodi muda rezultadu ba 1-0.
Golu ne’e la ohon Karketu nia vontade, klube ne’ebé lidera husi treinadór Afrikanu Bernard Teye halo mudansa ba jogu iha lina klaran hodi hetan ritmu jogu loloos, ikus iha duni rezultadu tanba jogu la’o to’o minutu 39 jogadór Daniel Gayo (9) konsege fura rede Karketu hodi muda rezultadu ba 1-1.
Golu ne’e halo Estádiu atu nakfera ho lian maka’as husi adeptu Karketu nian, Karketu organizadu tebes iha kampo laran, sira unidu, sira solidu atu gaiña vitória, solidu ne’e la hela de’it hanesan solidu, hatudu duni rezultadu tanba iha minutu 41 Karketu hetan tan oportunidade husi jogadór Daniel Gayo (11) prodús tan golu daruak hodi prega rezultadu ba 2-1.
Marca hala’o jogu ho meiu oioin maibé susar atu kombate Karketu nia atake, ikus minutu 45 iha primeira parte termina rezultadu hela provizoriu 2-1.
Dolar ba segunda parte, ekipa rua nafatin lansa kontra no atake ba malu ho kapasidade no abilidade ne’ebé iha, Marca esforsu atu halo empata jogu ne’e, maibé Karketu esforsu atu manán liuhusi aumenta golu.
Marca hatudu nia forsa liuhusi jogadór sira, maibé forsa hirak ne’e hela de’it ho naran tanba Karketu la fó fatin nune’e iha minutu 64 jogadór Angenuco Viegas (7) fura rede Marca hodi muda rezultadu ba 3-1.
Marca la satisfeitu ho rezultadu ne’e kontinuabreziste, ikus esfirsu hirak ne’e la hela de’it ho esforsu tanba iha minutu 74 jogadór Gabriel Pires (22) konsege prodús tan golu segundu ba Marca hodi muda rezultadu ba 3-2.
Golu ne’e hasa’e liutan Marca nia vontade, jogadór sira pasa bola husi ain ba ain, fintas ba fintas mai, ikus Marca labele hakat tan ba oin, hela de’it ho golu rua ne’e. Karketu la fó nia pontu fraku, nune’e jogadór Angenuco Viegas (7) halo jogu individu iha minutu 84 konsege halo golu hodi muda rezultadu ba 4-2 hodi hametin Karketu nia vitoria to’o jogu termina.
Jornalista : Hortêncio Sanchez
Editór : Cancio Ximenes
