DILI, 21 Maiu 2026 (TATOLI)—Ministériu Saúde liuhusi Departamentu Imunizasaun klarifika ba públiku katak estoke vasina antí raiva sufisiente hela no infomasaun ne’ebé mak espalla iha rede sosiál katak vasina antí raiva laiha ne’e lia falsa ka hoax.
Notísia Relevante:
Xefe Departamentu Imunizasaun iha Ministériu Saúde, Maria Angelina Pereira, hateten kona-ba vasina antí raiva stock out ne’e la loos tanba vasina refere daudaun ne’e iha nasionál sei iha 2.000-resin, tanba ne’e informasaun ne’ebé mak fó sai iha rede sosiál katak vasina antí raiva stock out ne’e laloos.
“Agora daudaun ita-nia estoke vasina raiva iha nasionál iha 2.330, ho ida-ne’e siginifika katak bele fornese de’it ba ema 500-resin, tanba vasina ne’e tenke halo dala haat, ne’ebé estoke ida ne’e mínimu tebes. Ne’ebé parte husi imunizasaun halo ona karta kuantifikasaun no haruka ba ona INFPM atu bele kompra lalais vasina antí raiva atu labele mosu stock out tan,” Maria Angelina Pereira hateten ba Jornalista sira iha nia kna’ar fatin, Kaikoli, ohin.
Nia esplika, kazu raiva ne’e mak daudaun aumenta sa’e mak Departamentu Imunizasaun iha MS haruka ona karta kuantifikasaun ba INFPM atu sosá tan vasina antí raiva hodi bele antesipa, nune’e labele mosu tan estoke laiha.
“Kazu agora daudaun aumenta sa’e. Bainhira asu tata, ita bele antesipa tiha buat sira hanesan atu estoke husi Ministériu Saúde to’o iha Sentru Saúde sira labele estoke out ho ida mak departamentu imunizasaun halo ona karta kuantifikasaun ba INFPM atu bele sosá ona vasina anti raiva,” nia dehan.
Tanba ne’e mak mak Departamentu Imunizasaun iha Diresaun Nasionál Materna Infatil iha Ministériu Saúde hakarak ko’alia de’it kona ba situasaun ida akontese iha Munisípiu Baucau ne’ebé mak dadaun ne’e virál iha facebook ema ida mate tanba de’it pasiente rasik la ba atu vasina maibé iha media sosial dehan katak vasina stock out iha ospitál referál Eduardo Ximenes iha Munisípiu Baukau, ida-ne’e informasaun la loos.
“La’ós tanba vasina ne’e husi kedas inisiu ami fó 1.700 itál iha Munisípiu Baukau, iha fila-fali Marsu ne’e akontese pasiente asu tata no nia ba halo konsulta iha ospitál referál Eduardo Ximenes Baukau, komu iha ospitál ne’e vasina mak la tau iha ne’ebá, maibé vasina iha Servisu Saúde Munisípiu Baukau no mós iha Sentru Saúde sira iha hotu, soké iha ospitál mak laiha,” nia dehan.
Entaun pesoál saúde sira-ne’ebé mak servisu iha emerjénsia hameno ba pasiente ne’e tenke lori ba iha sentru saúde sira ne’ebé mak besik iha ita-boot sira-nia hela fatin, atu nune’e bele hetan vasina raiva, maibé pasiente rasik mak la ba duni sentru saúde sira atu simu vasina.
Maibé kona-ba estock out ne’e la’ós ida, até agora de’it mós vasina anti raiva nia estoke hela 272 no ida fali vasina ida RIC ne’e agora daudaun iha Servisu Saúde Munisípiu Baukau ne;e hamutuk 150.
Nia dehan, razaun ida pasiente sira lakohi ba iha fasilidade saúde sira-ne’ebé mak besik iha sira-nia hela fatn atu simu vasina ne’e mak ladún hatene, karik pasiente ne’e mak laiha koñesimentu maibé informasaun sira-ne’ebé ekipa taskforce sempre halo sensibilizasaun ba komunidade kona-ba prevensaun ne’e rasik hala’o nafatin.
Maibé informasaun husi Ministériu Saúde liuhusi Diresaun Edukasaun Promosaun halo sensibilizasaun maibé ne’e la’ós Ministériu Saúde mesak, maibé servisu hamutuk ho Ministériu Administrasaun Estatál liuhusi Autoridade Munisípiu sira no mós Ministériu Agrikultura Peska Pekuária no Floresta, sira forma ekipa taskforce hodi halo sensibilizasaun no fahe informasaun ba komunidade,
“Karik iha ema na’in-rua mak asu tata keta demora lori lalais ba fasilidade saúde hodi hetan vasina, ida-ne’e depende ba ema ida-idak nia desizaun,” nia dehan.
Tanba ne’e, hanesan Xefe Departamentu Imunizasaun informa kedas ba responsavél iha programa imunizasaun iha Servisu Saúde Munisípiu Baukau tenke tau mós vasina iha ospital ne’eba, maibé sira tenke tuir formasaun ruma.
Nia relata, Ministériu Saúde kontaktu diretamente ba Servisu Saúde Munisípiu Baukau atu tun hodi apoiu ba Ospitál Referál Eduardo Ximenes liuliu sala emerjénsia karik ema hetan asu tata mak sira-ne’e fornese kedas vasina ba sira.
“Ida ne’e mak planu husi nasionál no ha’u kontaktu diretamente ba Servisu Saúde Munisípiu Baukau no ha’u ko’alia ho sira responsavel ba Programa Imunizasaun ida-ne’e planu urjente. Semana oin, tun halo orientasaun ba iha kolega sira-ne’ebé mak servisu iha ospitál nian liuliu iha sala emerjénsia nian, karik mosu ema ruma asu tata bele fornese diretamente vasina ba ema-ne’ebé mak asu tata,” nia dehan.
Jornalista : Felicidade Ximenes
Editór : Cancio Ximenes
