DILI, 22 Maiu 2026 (TATOLI)–Komisáriu Komisaun Antí-Korrupasaun (CAC, sigla portugéz), Rui Pereira dos Santos, hateten, nia parte halo ona komunikasaun ho Prokuradór Jerál Repúblika, Nelson de Carvalho atu delega hikas kazu korrupsaun ba CAC.
“Ha’u hanoin serbisu investigasaun la’o hela, Komisáriu mós iha komunikasaun ho Prokuradór Jerál, ami espera katak iha tempu besik Prokuradór Jerál bele redelega fali prosesu sira ne’e mai para ita bele halo fali serbisu investigasaun bele la’o di’ak,” Komisáriu CAC hateten ba Jornalista sira hafoin enkontru ho empreza manán-na’in ba dezeñu konstrusaun edifísiu CAC, iha Farol, Sesta ne’e.
Komisáriu dehan, nia parte tenke halo netik buat ruma hodi ema labele dehan CAC la halo nia serbisu ho di’ak.
“Ha’u hanoin Komisáriu rasik halo komunikasaun ho Prokuradór, katak prosesu sira ne’ebé iha redelega filafali mai para iha serbisu hamutuk atu serbisu hamutuk prevene no kombate korrupsaun, se lae buat hotu macet, ema haklalak ita, hakilar malu ladún di’ak,” nia katak.
Notísia relevante : Prokuradór Nelson rejeita la delega kompeténsia ba CAC halo investigasaun ba korrupsaun
Komisáriu hateten, nia parte sempre iha boa vontade atu komunika ho parte relevante sira.
“Prokuradór Jerál promete hela katak tempu besik sei redelega prosesu sira mai para ita bele konklui investigasaun tanba kazu balun ita investiga ona iha klaran, balun besik atu hotu ona, balun ita foin atu hahú. Tanba ne’e, ita espera Prokuradór Jerál bele ho nia estrutura ho Prokuradór Titulár bele tau konsiderasaun ba Komisáriu nia liafuan ne’ebé tatoli hela,” nia subliña.
Jornalista : Natalino Costa
Editora : Julia Chatarina
