DILI, 25 Maiu 2026 (TATOLI)—Primeiru-Ministru, Kay Rala Xanana Gusmão, hala’o enkontru ho Sekretáriu Jerál ASEAN Inter-Parliamentary Assembly (AIPA), Chen Widhya, hodi diskute kona-ba Timor-Leste nia preparasaun atu sai membru AIPA iha Novembru 2026.
Notísia Relevante: AIPA apoia Timor-Leste adere ba ASEAN
Sekretáriu Jerál ASEAN Inter-Parliamentary Assembly (AIPA), Chen Widhya, hateten iha onra atu halo vizita ba Primeiru-Ministru, Xanana Gusmão, hodi hametin fila-fali importánsia ASEAN nu’udar família membru Estadu sira-nian no kongratula Timor-Leste nia adezaun ba ASEAN iha Novembru 2025.
“Ha’u mós hanoin fali katak Kambodia kontente tebes tanba ami bele tulun Timor-Leste atu sai membru ASEAN. Tanba desizaun husi líder ASEAN sira atu simu Timor-Leste sai membru ASEAN iha Novembru 2022, bainhira realiza hela simeira ASEAN iha Phnom Penh, Reinu Kambodia,” Sekretáriu ASEAN AIPA ne’e relata ba jornalista sira iha Palásiu Governu, ohin.
Nia dehan, signifika katak sira la’ós de’it belun iha ASEAN maibé sai ona família. Família iha unidade, iha diversidade, iha kultura ne’ebé oioin, lian ne’ebé oioin, sistema governasaun ne’ebé oioin maibé sira família hamutuk iha ASEAN.
“No, ami fiar katak ASEAN sei lori benefísiu boot ba ami-nia povu liuliu povu ASEAN nian, inklui Timor-Leste tanba Timor-Leste mós sei sai membru ba da-11 Asembleia Inter-Parlamentár ASEAN (AIPA),. Tanba ASEAN iha oin rua, ida mak Governu, ida seluk mak Parlamentu,” nia informa.
Tanba ne’e, aspetu Parlamentu ASEAN nian sei loke ba Timor-Leste iha Manila, iha Asembleia Jerál, Asembleia Jerál ba da-47 iha 16 to’o 22 Novembru 2026.
“Tanba ne’e, mensajen ida-ne’ebé ha’u hakarak hato’o ba imi mak ami-nia delegasaun, Sekretariadu AIPA, sei mai iha ne’e atu fó briefing ezekutivu. Ne’ebé, ami halo ona dadeer ne’e iha Parlamentu Nasionál, hodi prepara atu tulun Timor-Leste nia adezaun iha Novembru. No, agora ha’u sei halo Roadshow AIPA ida iha UNTL hodi introdús AIPA ba povu liuliu ba joven sira, estudante sira, tanba ami fiar katak estudante sira mak líder futuru nasaun nian. Tanba ne’e, ami prepara futuru Timor-Leste nian hamutuk ho imi,” nia dehan.
Jornalista : Alexandra da Costa
Editór : Cancio Ximenes
