DILI, 26 Maiu 2026 (TATOLI)—Membru Polísia Nasionál Timor-Leste (PNTL) Rejiaun Administrativa Espesiál Oekusi Ambeno (RAEOA) buka tuir Prizioneiru CM ne’ebé iha Domingu (24/05) halai sai hafoin tuir julgamentu.
CM husi Bioni Aldeia Makelop, Suku Tauboku Oekusi, nu’udar prizioneiru ida-ne’ebé envolve krime violasaun sexuál, ne’ebé tuir loloos daudaun kumpre hela pena prizaun, maibé bainhira submete ba julgamentu iha Tribunál Judisiál Primeira Instánsia Oekusi, hafoin julgamentu hotu, CM halai.
“Prizioneiru ida komete krime violasaun sexuál, hala’o julgamentu iha Oekusi, depois julgamentu sai mai ita bele dehan katak asaun niglijénsia no falta kontrolu husi ita-nia ekipa ne’ebé mak lori detidu halo julgamentu,” Komandante PNTL RAEOA, Superintendente Xefe Nicolau Francelino, hato’o ba Jornalista sira iha edifísiu CNE, Kaikoli, Tersa ne’e.
Nia haktuir, julgamentu ramata ona, maibé ekipa la konsege asegura CM. Prizioneiru ne’e halai sai husi prizaun maizumenus tuku 18:00, nune’e Komandante PNTL RAEOA simu informasaun verbál husi Xefe Investigasaun Kriminál Oekusi, katak detidu konsege halai sai husi ekipa nia kontrolu.
“Entaun momentu ne’ebá, ha’u rona ida-ne’e, iha kalan kedan ha’u orienta ita-nia ekipa. Ha’u kontaktu Xefe Investigasaun Kriminál, ba ita-nia J2 ne’ebé destaka iha ne’ebá, ho parte SNI (Servisu Nasionál Intelijénsia) atu kolabora buka no deteta paradeiru detidu iha ne’ebá. Mas ate agora ita-nia ekipa konjunta sei la’o hela”, nia informa.
Notísia relevante : Xefe Estadu sei fó indultu ba prizioneiru na’in-25 iha komemorasaun 28 Novembru
Superintendente Xefe Nicolau Francelino dehan, kestaun ne’e la’ós PNTL de’it maibé kooperasaun entre ekipa iha ne’ebá, husi parte forsa intervensaun Komandu PNTL no J2 esforsu nafatin atu buka tuir detidu hodi bele koopera ho parte justisa.
“Buka halai dook hanesan ne’e, nia pena bele todan liután. Ha’u nu’udar Komandante Komandu Rejiaun Espesiál Oekusi apela ba ita hotu, inklui família ne’ebé mak subar detidu, di’ak liu entrega-an para kolabora ho justisa para hetan rezultadu finál,” nia afirma.
Parte PNTL ba kestaun ne’e seidauk hatene loloos prizioneiru ne’e moras ou hanesan ema normál.
“Bazeia ba akontesimentu ne’e, husi Polísia mak kontinua nafatin, buat ida atu moras ka la moras ne’e parte saúde mak bele hatene loloos,” nia hato’o.
Autoridade Seguransa la hatene kona-ba prizioneiru tau ka la tau alzema hafoin julgamentu tanba segredu justisa ne’e labele públika.
“Maibé bazeia ba informasaun, ita-nia ekipa sira ne’ebé lori mai ne’e dehan katak prizioneiru ne’e halai sees tanba falta kontrolu husi ekipa sira ne’ebé momentu ne’e lori ba Tribunál. Maibé ida ne’e kompeténsia husi parte Tribunál ou Mistériu Públiku, husi PNTL kontinua orienta para ekipa atu buka paradeiru iha ne’ebé para ami buka nafatin nune’e ami hetan nia rezultadu finál para aprezenta filafali ba órgaun kompetente,” nia tenik.
Jornalista : Natalino Costa
Editora : Julia Chatarina
