VIKEKE, 27 Maiu 2026 (TATOLI)—Koordenadór Bee Timor-Leste, Empreza Púplika (BTL, E.P.) Munisípiu Vikeke, Marito da Costa, informa daudaun ne’e BTL, E.P. destaka ona funsionáriu hamutuk na’in-tolu iha Postu Lakluta hodi rejista klinte sira no kontrola distribuisaun bee-moos ba komunidade.
“Kona-ba fornesimentu bee-moos ba komunidade iha Postu Lakluta, ami koloka ona funsionáriu hamutuk na’in-tolu iha Postu Lakluta. Nune’e, daudaun ne’e ita-nia funsionáriu sira halo hela rejistrasaun dadus ba kliente kada uma-kain ne’ebé utiliza ona kontadór,” Marito da Costa ba TATOLI iha Postu Vikeke Vila, Kuarta ne’e.
Notísia relevante: Autoridade husu BTL aselera inaugurasaun sistema bee-moos iha Lakluta
Koordenadór ne’e hatutan BTL komesa distribui bee-moos ba komunidade iha Postu Lakluta ne’ebé kada loron funsionáriu rekolla dadus no kontrola distribuisaun bee-moos ba kliente sira.
“Ita komesa ona fornese bee-moos ba populasaun hamutuk uma-kain 555. Husi uma-kain sira-ne’e ita instala hotu ona kontadór. Maibé, selu tarifa seidauk tanba daudaun ita foin rekolla dadus utilizadór nian. Bainhira rekolla hotu dadus hafoin selu,” nia hato’o.
Maski nune’e, Marito dehan, obra sistema melloramentu bee-moos ba Postu Lakluta nian seidauk konkluidu.
“Obra Lakluta to’o agora empreza seidauk konklui. Servisu ne’ebé empreza sei halo mak instala redi hale’u tanke rezervatóriu. Loloos hotu ona, maibé impaktu udan no ponte kotu, entaun difikulta ba ita-nia empreza konklui obra,” nia akresenta.
Tuir Marito katak hafoin empreza konklui redi protesaun ka aprezenta progresu 100% nian inklui inspesaun tiha, hafoin BTL planeia inaugurasaun obra referida.
Entretantu, ekipa téknika operadór ne’ebe destaka iha Postu Administrativu Lakluta kontinua foti dadus kliente iha Aldeia Aidak-Laran iha area Postu Lakluta. Aleinde ne’e, ekipa seluk mós halo levantamentu dadus kona-ba ligasaun sira-ne’ebé presiza atu halo manutensaun iha Postu Lakluta.
Jornalista: Vitorino Lopes da Costa
Editór: Xisto Freitas da Piedade
