Autoridade husu BTL aselera inaugurasaun sistema bee-moos iha Lakluta
VIKEKE, 20 Outubru 2025 (TATOLI)—Xefe Suku Dilór, Postu Administrativu Lakluta, Munisípiu Vikeke, Jacinto Ximenes husu Bee Timor-Leste, Empreza Públika (BTL, E.P.) aselera inaugurasaun sistema melloramentu bee-moos iha Postu Lakluta.
“Ohin loron melloramentu bee-moos iha Postu Lakluta konkluidu ona, maibé to’o agora seidauk inaugura. Tanba ne’e, ha’u husu ba BTL, E.P. bainhira loos mak bele halo inaugurasaun tanba ita halo ona melloramentu bee-moos ba komunidade,” Jacinto Ximenes ba TATOLI iha Dilór, Segunda ne’e.
Notísia relevante: https://tatoli.tl/2025/09/08/projetu-sistema-melloramentu-bee-moos-iha-lakluta-konkluidu/
Iha fatin ketak, Koordenadór BTL, E.P. Munisípiu Vikeke, Marito da Costa klarifika katak kona-ba inagurasaun ne’e parte nasionál mak sei fó oráriu ba inagurasaun nian.
“Obra hotu ona 100%. Ba inaugurasaun ne’e depende ba nasionál. Parte nasionál mak sei deside data fixu hafoin ita realiza serimónia inaugurasaun,” nia tenik.
Marito haktuir maski seidauk inaugura, maibé BTL, E.P. hahú fornese daudaun bee-moos ba komunidade hodi hein inaugurasaun.
Jornalista: Vitorino Lopes da Costa
Editór: Xisto Freitas da Piedade
