VIKEKE, 08 Setembru 2025 (TATOLI)—Koordenadór Bee Timor-Leste, Empreza Públika (BTL, E.P.) Munisípiu Vikeke, Marito da Costa informa progresu projetu kontrusaun sistema melloramentu bee-moos ba Postu Lakluta daudaun ne’e empreza konkluidu ona obra.
“Progresu konstrusaun sistema bee-moos ba Postu Lakluta konkluidu ona. Ita hein inaugurasaun de’it. Kona-ba tanke mós ita-nia empreza konkluidu ona, nune’e mós kanaliza bá kada uma-kain sira empreza finaliza ona,” Marito da Costa hateten ba TATOLI iha Postu Vikeke Vila, Segunda ne’e.
Notísia relevante: https://tatoli.tl/2024/09/03/progresu-konstrusaun-sistema-bee-moos-iha-lacluta-atinje-80/
Marito haktuir maski seidauk halo inaugurasaun maibé kanaliza daudaun bee-moos ba populasaun sira.
“Tuir planu, Primeiru-Ministru (PM), Kay Rala Xanana Gusmão mak sei mai halo inaugurasaun ba projetu ne’e,” nia subliña.
Aleinde ne’e, Marito dehan, projetu referidu sei ih retensaun ba empreza rua hanesan empreza Luminar Unipessoal, Lda ne’ebé responsabiliza ba tanke durasaun retensaun fulan tolu, enkuantu Empreza Timorindo responsabiliza ba kanalizasaun ho durasaun retensaun fulan neen.
“Nune’e ba pagamentu ikus nian seidauk. Bainhira halo hand over obra ona hafoin halo pagamentu ikus nian ba empreza rua ne’ebé implementa obra bee-moos iha Postu Lakluta,” nia hato’o.
Enkuantu, projetu melloramentu sistema bee-moos ba Postu Administrativu Lakluta husi foho Bibileo hun ho distánsia kilómetru 4,5 ho kustu $582.100. Projetu referidu sei benefísia ba abitante Lakluta ne’ebé hela iha Postu Lakluta Vila, área Suku Dilór ho total populasaun 4.158 no uma-kain 693.
Jornalista: Vitorino Lopez da Costa
Editór: Xisto Freitas da Piedade
