DILI, 27 Maiu 2026 (TATOLI)—Governu liuhusi Vise-Ministru Asuntu Asuntu Parlamentár, Adérito Hugo, deklara orsamentu retifikativu ne’ebé Governu prevee hamutuk millaun $40 ne’e senáriu preparativu ba pontu prinsipál tolu mak seguransa anerjétika, rezerva kombustível no rezerva presu aihán, bainhira afeta husi funu iha médiu oriente nafatin prolongadu.
Notísia Relevante: Pareser ba proposta Orsamentu Retifikativu aprovadu, 28 Maiu debate jeneralidade
Governante ne’e hateten, hanesan imi hatene katak Governu da-sia (IX) iha tinan ida-ne’e aprezenta orsamentu retifikativu no pareser sira halo ona submisaun ba iha Parlamentu Nasionál no audiénsia públika mós halo tiha ona, aban hein halo debate jeneralidade ba proposta orsamentu retifikativu 2026 nian.
“Orsamentu retifukativu sei tau prioridade ba pontu tolu, tanba funu iha médiu oriente nafatin prolongada, entaun ita tenke iha senáriu preparative,” Vise-Ministru ne’e informa ba jornalista sira iha Ministériu Finansa, Aitarak Laran, ohin.
Tanba ne’e, nia dehan, iha orsamentu retifikativu ne’e Governu aloka montante millaun $40 hodi antesipa impaktu husi funu iha médiu oriente
“Ema balun dehan funu ne’e para ona no presu mina normál ona, ne’e lae tanba funu kontinua hela iha médiu oriente hanesan iha horisehik no horikalan sei iha atake bomba ba malu,” nia hateten.
Nune’e, razaun ba orsamentu retifikativu ne’e atu asegura enérjetika atu garante ho orsamentu millaun $168 ba fasilidade instalasaun vitál Estadu nian hanesan iha sentrál eletrisidade Betanu, Hera no Oekusi.
“Entaun orsamentu retifikativu ne’ebé aprezenta ne’e atu halo ezersísiu interna iha lina ministeriál sira atu taka fali depozitu ne’ebé aloka ba millaun $168 no agora atinje tan ona ba millaun $192,” nia dehan.
Notísia Relevante: Orsamentu Retifikativu prevee medida hitu hodi responde ba impaktu husi funu iha Médiu Oriente
Jornalista : Alexandra da Costa
Editór : Cancio Ximenes
