BOBONARU, 28 Maiu 2026 (TATOLI) – Komisaun Nasionál Eleisaun (CNE, sigla portugés) no Sekretariadu Tékniku Administrasaun Eleitorál (STAE) realiza atividade edukasaun sívika hodi introdús lei númeru 22/2021, Lei Eleitorál Munisipál no lei númeru 23/2021 kona-ba Lei Podér Lokál no Desentralizasaun Administrativa ba estudante besik 100 husi Eskola Sekundária Jerál Katólika (ESGC, sigla portugés) Santo Agostinho, iha postu administrativu Bobonaru, munisípiu Bobonaru.
Vise-Prezidente CNE, Domingos Barreto, hateten programa ne’e realiza atu estudante sira esklaresidu kona-ba sira-nia devér no direitu husi lala’ok eleisaun nian molok realiza eleisaun órgaun reprezentativu munisipál.
Programa ida-ne’e hanesan faze preparasaun atu hasoru eleisaun kámara munisipál ne’ebé tuir planu sei realiza iha tinan 2027.
Notísia relevante: Komisaun A aprezenta alterasaun Lei Eleitorál no Eleisaun Munisipál
“Edukasaun sívika ida-ne’e la’o iha territóriu tomak depoizde Governu fó sai Lei Eleisaun Podér Lokál no Desentralizasaun. Polítika Governu nian mak halo edukasaun sívika ne’e ba estudante, joven sira, tanba idade 16 no 17, iha direitu atu tuir eleisaun”, nia informa iha salaun Parókia Bobonaru, ohin.
Reprezentante Diretór ESGC Santo Agostinho Bobonaru, Pe. José Henriques, agradese no konsidera programa ne’e importante tebes tanba estudante barak mak idade to’o ona atu partisipa iha eleisaun tuirmai.
Vigáriu Parókia Bobonaru ne’e subliña katak liuhusi atividade ne’e bele hasa’e liután estudante sira-nia koñesimentu kona-ba regra no Lei Eleisaun Munisipál.
“Eleisaun, ami mós iha matéria ida sidadania no dezenvolvimentu iha kápitulu balun ko’alia kona-ba eleisaun. Eleisaun Prezidensiál, Parlamentár, Suku no Munisipál, buat hirak ne’e ami aprende. Ha’u hanoin ho sosializasaun ida-ne’e halo sira bele komprende kle’an, nune’e aban-bainrua sira labele husik boletín votu mamuk de’it”, saserdote ne’e dehan.
Programa edukasaun sívika ne’e involve mós parte Rejistu Notariadu Munisípiu Bobonaru hodi introdús kona-ba prosesu no lala’ok trata dokumentu Sertidaun Moris RDTL no komprovativu sira seluk tan.
Notísia relevante: Garante eleisaun munisipál iha 2027, CNE propoin aumenta númeru Komisáriu
Jornalista: Sergio da Cruz
Editora: Maria Auxiliadora
