DILI, 28 Maiu 2026 (TATOLI) – Parlamentu Nasionál no Governu hahú ohin diskusaun kona-ba proposta Orsamentu Retifikativu (OR) ho montante millaun $192 iha faze jeneralidade.
Proposta OR ne’e aprezenta ho karáter urjénsia, no Governu prevee medida hitu ne’ebé fó prioridade ba garantia seguransa enerjétika no seguransa alimentár iha país, relasiona ho impaktu husi fundu Médiu Oriente.
Notísia relevante: Orsamentu Retifikativu prevee medida hitu hodi responde ba impaktu husi funu iha Médiu Oriente
Tuir giaun debate, diskusaun faze jeneralidade sei hala’o durante loron ida. Debate hahú ho intervensaun Primeiru-Ministru, Xanana Gusmão, tuir aprezentasaun relatóriu no pareser Komisaun C ne’ebé trata Asuntu Finansa Públika. Depoizde ne’e, deputadu sira husi bankada parlamentár sei halo intervensaun tuir tempu ne’ebé distribui ona iha grella no Governu fó resposta.
Hafoin dikusaun, Parlamentu sei prosede ba votasaun proposta lei iha faze jeneralidade.
Debate iha faze espesialidade sei realiza entre 29 Maiu no 02 Juñu, ho metodolojia sei diskute espesifikamente kada artigu no alínea iha proposta lei.
Eventuál proposta alterasaun sei aprezenta iha finál diskusaun no votasaun faze jeneralidade. Bainhira termina diskusaun faze espesialidade, Parlamentu sei kontinua kedas ho votasaun finál globál.
Jornalista: Nelson de Sousa
Editora: Maria Auxiliadora
