DILI, 28 Maiu 2026 (TATOLI)—Inspetór ne’ebé mak Tribunál Rekursu (TR) rekruta hodi durante ne’e halo inspesaun ba juíz sira-nia serbisu iha Tribunál Judisiál Primeira Instánsia Dili (TJPID) Baukau, Suai no Oekusi inklui TR, finaliza ona nia serbisu no relatóriu hodi submete ona ba Prezidente Tribunál Rekursu, Afonso Carmona.
“Inspetór relata mai ona, kada faze de’it liliu kona-ba serbisu juíz, orsida membru Konsellu mak sei distribui ba Sekretária Konsellu hodi halo lista ida na’in hira hodi submete ba Konsellu para atu omologa rezultadu. Tanba ne’e mak ohin ha’u halo uluk kuadru lei,” Afonso Carmona hateten ba Jornalista sira iha Hotel Timor, Kinta ne’e.
Daudaun asina uluk kuadru lei nune’e fó biban hodi loke vaga ba promosaun ba juíz sira, nune’e bele hatene juíz sira ne’ebé liu no la liu.
Kuadru legál atu define juíz sira ne’ebé aban bainrua promovidu ba segunda klase no primeira klase tuir saláriu.
“Ita iha konkluzaun katak ita bele halo promosaun, maibé tanba liga ho lei dehan tenke iha kuadru, entaun ha’u hanoin ohin ne’e, ha’u tenke asina karta ida atubele iha fiksu ba vaga ne’e,” nia tenik.
Notísia relevante : Komisaun Rekrutamentu Juíz ba STJ hahú serbisu iha edifísiu provizóriu
Konsellu Superiór Majistratura Judisiária sei deside mós kestaun ne’e.
“Se karik semana ida-ne’e sira asina, entaun semana oin ita bele ko’alia kona-ba promosaun deviza. Tanba primeiru tenke ser iha vaga ida ho orsamentu ne’ebé mak iha atu tau ba sira (juíz) nia, liuliu sira-nia saláriu atu promove ona sira,” nia tenik.
Nune’e, Komisaun Rekrutamentu Juíz mak sei haree kona-ba kestaun promosaun ba juíz.
“Ohin ha’u asina kuadru legál hodi loke vaga promosaun, ita la ko’alia sé mak hetan promosaun ne’e kompeténsia komisaun nian, maibé kuadru legál ne’e importante tanba iha vaga mak iha promosaun. Ha’u hanoin sira tenke ser aprova, tanba tuir lei ne’e konsellu mak termina, entaun kuandu sira mak la jogu aprova mós problema hotu,” nia hato’o.
Jornalista : Natalino Costa
Editora : Julia Chatarina
