VIKEKE, 28 Maiu 2026 (TATOLI)—Koordenadór Ministériu Obra Públika (MOP) Munisípiu Vikeke, Mário Ângelo Menezes, informa estrada husi Vikeke Vila bá Postu Uatulari ne’ebé estraga husi udan normaliza ona, tan ne’e daudaun ne’e fasilita ona movimentu transporte públiku sira.
“Estrada sira husi Vikeke Vila bá Uatulari no Uatulari ba Uatukarbau ne’ebé foin lalais udan estraga, ita orienta empreza no Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADI, I.P.) normaliza ona. Nune’e, daudaun ne’e ita-nia movimentu transporte la’o di’ak fali ona,” Mário hateten ba TATOLI iha Postu Vikeke Vila, Kinta ne’e.
Nia dehan, antes ne’e estrada komesa husi Vikeke Vila sa’e bá Uatulari kotu, balun besik monu no mota Beasu fatuk nakonu tiha hodi difikulta movimentu sira.
Notísia relevante: MOP orienta IGEADI normaliza estrada Vikeke Vila-Uatulari-Uatukarbau ne’ebé hetan estragu
“Normaliza estrada estrada ne’e IGEADI mak servisu husi Naeboruk to’o to’o Uma-Ua’in Leten. Sira ateru filafali dalan sira-ne’ebé aat sira, inklui ke’e sai bee nalihun sira iha estrada klaran,” nia haktuir.
Enkuantu, Mário tenik, estrada husi Uatulari bá Postu Uatukarbau MOP koordena ho empreza Bere Is Beck halo normaliza husi parte Loibai to’o Vessoru, iha ne’ebé empreza konklui ona servisu.
Iha fatin ketak, tékniku empreza Bere Is Beck, Andre da Costa Tavares, haktuir empreza Bere Is Beck mak halo normalizasaun husi ponte Metauai, tanba antes ne’e estrada monu iha parte Didimera no estrada Loibai nian.
“Husi estrada aat sira-ne’e ami ateru di’ak hotu ona. Ami servisu durante loron haat hodi halo normalizasaun estrada sira-ne’e. Hafoin ami halo tiha nornalizasaun, daudaun ne’e transporte husi Uatukarabau bá munisípiu la’o normál fali ona,” nia tenik.
Jornalista: Vitorino Lopes da Costa
Editór: Xisto Freitas da Piedade
