DILI, 28 Maiu 2026 (TATOLI)—Ministra Saúde, Élia dos Reis Amaral, hateten Ministériu Saúde simu ona pedidu husi Hospitál Nasionál Guido Valadares (HNGV) hodi halo rekrutamentu ba profisionál saúde hodi prienxe edifísiu pediatria andar lima ne’ebé mak empreza CCECC sei entrega ba Governu iha tempu badak nia laran.
Notísia Relevante: HNGV sei rekruta profisionál saúde 400-resin servisu iha edifísiu pediatria andar lima
“Loos dunia, HNGV hatama ona lista rekrutamentu, iha ona ha’u-nia meza. Entaun, ami simu ona mapeamemtu ne’ebé mak haruka husi Hospitál Nasionál Guido Valadares atu halo rekrutamentu ba profisionál saúde sira. Sira-ne’e enfermeira, parteira nomós tékniku sira-ne’ebé mak ho kualidade. Ha’u rasik sei halo akompaña ba ezame ne’e,” Élia dos Reis Amaral hateten ba jornalista sira hafoin partisipa debate Orsamentu Retifikativu iha PN, ohin.
Nia esplika, durante ne’e profisionál saúde sira halo atendimentu sira la’o ladún di’ak karik, maibé iha rekrutamentu ida-ne’e hakarak atu hadi’a di’ak-liu hodi garante nia kualidade.
“Iha pediatria ne’e, ita hakarak hadi’a neineik, atu nune’e ba beibeik ita garante ho iha nia kualidade,” nia dehan.
Antes ne’e, Diretor Servisu Apoiu Diagnóstiku no Terapeutiku iha HNGV, Vidal de Jesus Lopes, informa kona-ba prosesu rekrutamentu nian ne’e iha tempu badak Hospoitál Nasionál Guido Valadares sei establese komisaun ida hala’o prosesu rekrutamentu hodi prienxe iha edifísiu pediatria andar lima ne’e.
“Orsamentu ba prosesu ne’e aprova ona no presiza ezekuta lalais. Kona-ba montante hira mak ha’u ladún lembra maibé orsamentu iha ona,” Vidal de Jesus Lopes hateten ba jornalista sira iha nia kna’ar fatin.
Profisionál Saúde sira-ne’ebé mak Hospitál Nasionál Guido Valadares atu halo rekrutamentu entre 300 ka 400-resin, maibé depende ba nesesidade servisu ospitál nian.
“HNGV sei forma ekipa espesífika ida atu jere prosesu rekrutamentu ne’e. La’ós HNGV de’it, maibé sei halo koordenasaun hamutuk ho Komisaun Funsaun Públiku no Ministériu Saúde. Iha posibilidade katak kandidatu sira-ne’ebé pasa prosesu rekrutamentu bele sai funsionáriu públiku tuir regra no mekanizmu Governu nian,” nia dehan.
Jornalista : Felicidade Ximenes
Editór : Cancio Ximenes
