DILI, 28 Maiu 2026 (TATOLI)–Prezidente Tribunál Rekursu Afonso Carmona, klarifika Tribunál Rekursu (TR) atrazu fó vistu préviu ba obra reabilitasaun estrada ne’ebé Governu lansa ona.
“Kamara de Kontas nia serbisu halo kontrola de’it, projetu boot sira ne’ebé presiza vistu husi Tribunál Kontas ida-ne’e maka sira halo mai, ha’u la hatene númeru hira husi ne’ebá mak Tribunál de Kontas sei hare fali nia atividade orsamentu ne’e liga ho orsamentu Jerál Estadu ka lae,” Prezidente Tribunal Rekursu, Afonso Carmona, hato’o ba Jornalista sira iha Hotel Timor, hafoin ramata lansamentu manuál auditoria finanseira, Kinta ne’e.
Nia hatutan, dalaruma mosu problema tanba ministériu sira-nia atividade bele sees husi orsamentu ne’ebé aprova, se sees husi ne’e tenke haruka filafali halo kompletu tuir regra.
Carmona fó ezemplu, iha lei dehan projeitu ne’ebé labele ezekuta maibé bele aumenta husi projeitu seluk, maibé nia labele liu pursentu 20, dalaruma mosu problema hola ne’e liu pusentu 20.
“Ida-ne’e mak dalaruma mosu problema Tribunál la fó vistu. Tanba ne’e, dalaruma la’ós Tribunál mak lakohi fó vistu hodi atividade la la’o, maibé sira sees husi regra ne’ebé iha,” nia akresenta.
Notísia relevante : Tribunál emite ona vistu préviu ba reabilitasaun estrada Ermera
Prezidente Tribunál Rekursu dehan, ministériu bele foti husi pursentu 20 ba projetu seluk, no pursentu 20 ba projeitu ne’e tau hamutuk hodi la’o.
“Maibé sira foti ida-ne’e liu tiha entaun problema iha lei ona, la’ós Tribunál mak halo polítika atu atividade labele la’o. Iha lei hateten momos dehan atu foti husi ida-ne’ebá koloka fali mai iha ne’e, labele liu pursentu 20,” nia katak.
Aleinde ne’e, Carmona seidauk hatene projeitu boot hirak mak hetan ona vistu préviu, maibé nia foin hetan informasaun kona-ba projeitu Aereportu nian.
“Maibe labele ko’alia uluk antes Kámara de Kontas relata, tanba agora prepara relatóriu anuál nian, sira hotu hatama sira-nia atividade depois halo konkluzasaun mak foin informa kona-ba projeitu hirak mak hetan ona vistu,” nia tenik.
Nia dehan, dalaruma aumenta orsamentu ne’e liu tiha pursentu 20 lei prevee, “tuir loloos retifikativu la’o ne’e tama kedas iha ne’ebá lalika kria konfuzaun.”
Jornalista : Natalino Costa
Editora : Julia Chatarina
