Opozisaun husu Governu masimiza Programa Kréditu Saudavel ba setór produtivu sira
DILI, 29 Maiu 2026 (TATOLI)-Bankada FRETILIN husu ba Governu atu masimiza Programa Kréditu Saudavel ba setór produtivu sira, tanba grupu barak mak hakarak atu asesu ba programa ne’e.
Deputadu Antoninho Bianco solisita ba Ezekutivu atu esplika progresu husi programa ne’e, atu grupu sira ne’ebé hala’o atividade ekonómia bele asesu hodi dezenvolve área ne’e.
“Ida-ne’e importante tanba ami tun bá baze ema sempre husu Kréditu Saudavel ne’e oinsá ona”, Antoninho Bianco hato’o iha debate espesialidade Orsamentu Retifikativu, iha Parlamentu Nasionál.
Nia dehan Governu mós presiza esplika kona-ba setór privadu hira mak asesu ona no nia obstákulu durante implementa atu públiku bele hatene no hakarak kréditu karik bele hetan informasaun.
Hatán ba kestaun ne’e, Ministru Koordenadór ba Asuntu Ekonómiku, Francisco Kalbuadi Lay, hateten Kréditu Saudavel prevee orsamentu hamutuk millaun $50, husi montante ne’e foin ezekuta maizumenus rihun $800.
“Programa ne’e daudaun seidauk la’o, tanba hafoin fó kreditu ba benefísiariu sira, iha problema interna, balun di’ak no balun ladi’ak ne’e mak para tiha”, nia esplika.
Nia salienta katak kréditu ne’e BNCTL mak jere no Governu hanesan asionista, iha fulan tolu ka neen hamutuk halo asembleia jerál dala-ida. Hanesan asonista haree lala’ok sira ne’e la’o tuir lei ka la’e.
Ministru Obra Públika, Samuel Marçal, nu’udar reprezentante BNCTL hateten foin daudaun maka halo reuniaun hamutuk ho BNCTL no tuir informasaun katak setór privadu lubuk ida mak hahú foti kréditu ne’e iha banku.
“Iha kestionáriu boot ida ne’ebé sira hato’o mai katak setór privadu kuaze 330 foti kréditu iha BNCTL hodi ajuda sira haburas sira-nia kompañia rasik”, nia informa.
Programa ne’e impelementa iha 2021 to’o 2023 ho naran Kréditu Suave, no mai iha Governu atuál muda naran ba Kréditu Saudavel.
Rezultadu husi programa ne’e hatudu katak pozitivu no ajuda dezenvolvimentu mikro, pekena no média empreza, hodi kontribui ba ekomomia nasionál.
Programa Kréditu Suave (agora Saudavel) ne’e introdús husi Governu anteriór. Husi implementasaun, iha 2021, ministériu simu proposta hamutuk 77, iha 2022 mós simu proposta 77 no 2023 iha 41. Husi totál ne’e, proposta 103 hetan aprovasaun liuhusi prosesu verifikasaun no avaliasaun. Iha finál, BNCTL aprova empreza 47 mak asesu ba kréditu, enkuantu proposta 12 rejeitadu no 44 pendente.
Empreza 47 ne’ebé aprovadu hala’o atividade ekonómika iha setór indústria 21, agrikultura 14, turizmu sia no komérsiu tolu.
Kréditu Saudavel ne’e ho objetivu mak atu fasilita empreza sira asesu ba finansiamentu ho taxa juru neʼebé ki’ik, hodi hadi’a kapasidade negósiu iha merkadu nasionál.
Liuhusi programa ne’e, benefisiáriu bele asesu kréditu entre $1.000 to’o 25.000 ho taxa juru 3% kada tinan.
Notísia relevante: MKI monitoriza empreza 47 ne’ebé sai benefisiária ba Kréditu Saudavel
Jornalista: Arminda Fonseca
Editora: Maria Auxiliadora
