BOBONARU, 29 Maiu 2026 (TATOLI) – Sekretariadu Tékniku no Administrasaun Eleitorál (STAE) presiza reativa atendimentu movel ba Resensiamentu Eleitorál no Atualizasaun Baze de Dadus (REABD) ba kartaun eleitorál biométriku iha postu administrativu Bobonaru, hodi fasilita estudante no komunidade asesu ho fásil no besik liután.
Rita de Jesus Soares, membru komunidade husu ba STAE halo atendimentu movel ba sira, tanba viajen bá-mai atu trata dokumentu ne’e dook. “Dalaruma bá mak la konsege urus, hein to’o aban. Bá-mai gasta osan barak, gasta tempu, di’ak liu mai loke iha postu semana ida ka rua hanesan ne’e para ami bele ba urus hotu”, nia sujere.
Rekomendasaun hanesan mai mós husi Lamberto Cardoso, nune’e nia mós bele trata kartaun, tanba bá to’o Maliana ema barak no distánsia dook.
Profesór Eskola Sekundária Jerál Katólika Santo Agustinho Bobonaru, Pe. José Henriques, argumenta katak presiza hakbesik atendimentu ne’e to’o duni nivel postu administrativu, tanba estudante barak mak atinje ona idade 17 to’o 20-resin, maibé to’o agora seidauk iha kartaun eleitorál.
Saserdote ne’e sujere atu intregra mós atendimentu ba Sertidaun Moris RDTL no Billete Identidade (BI).
“Ita nia povu balun mak lamenta dehan sira bá sistema mak la di’ak, blanko laiha. Tanba ne’e, sira ne’ebé hela hanesan iha Molop ne’ebá, Sibuni bá to’o iha Maliana ne’ebá gasta osan hira bá-mai, labele halo buat sira ne’e. Ha’u hanoin husi notariadu presiza haree buat ne’e ho di’ak tanba ita-nia povu sira presiza mós halo dukumentu”, nia hato’o.
Servisu hirak ne’e tinan kotuk liubá, STAE no Notáriadu halo ona iha postu administrativu Bobonaru no postu sira seluk.
Notísia relevante: STAE Bobonaru lansa REABD movel prodús kartaun biométriku ba Idozu-EhD
Jornalista: Sergio da Cruz
Editora: Maria Auxiliadora
