Hakerek-na’in:
Rafael Ximenes de A. Belo
Nú. Kontaktu (+670) 78111 1942
Facebook: Rafy Belo Atl
Hanesan “Tasi-Mane” ne’ebé deskansa hakmatek metin iha foho Ramelau nia tutun, ka hanesan fitun funu-na’in ne’ebé haroman ita-nia istória nia nakukun, domin la’ós de’it liafuan ne’ebé anin lori ba dook. Domin maka abut, odamatan, no klamar ne’ebé fó moris ba ita-nia ezisténsia. Iha ita-nia kultura “lulik” no ita-nia identidade nu’udar Timoroan, ita aprende ona katak funu bele mosu no terus bele mai, maibé domin nunka bosok. Ne’e maka forsa ne’ebé moos ne’ebé lori ita ba oin – husi katuas eh ferik no ba joven (feto eh mane) – transforma mehi sira ba realidade, husik terus ba liberdade, no sai naroman ne’ebé orienta dalan ba nasaun doben ida-ne’e.
Reflesaun kle’an ida-ne’e tenke hahú iha ita-nia laran, liuhusi domin ba aan rasik. La’ós ho arogánsia ka orgullu, maibé ho dignidade atu buka naroman iha koñesimentu no morál nu’udar fundamentu ba ita-nia kreximentu no dezenvolvimentu. Husi forsa interiór ida-ne’e mak domin irradia ninia naroman ba ita-nia família sira, nu’udar “uma-lulik” dahuluk ne’ebé hakiak, hakuak, no hanorin ita kona-ba sentidu moris nian. Família maka fatin ne’ebé ita aprende atu rona malu ho afetu sinseru, harii fundasaun metin ida-ne’ebé sei la monu bainhira anin-fuik maka’as huu husi li’ur mai. Ba família ida-ne’ebé unidu maka xave ne’ebé loke odamatan ba futuru ida-ne’ebé seguru.
Bainhira domin metin iha ita-nia fuan, ida-ne’e la’ós de’it nakfilak iha uma-laran, maibé transforma ba istória épiku boot ida-ne’ebé bazeia iha nasionalizmu no patriotizmu, domin ba ita-nia rain no nasaun. Ita-nia patrimóniu moris husi raan no matan-been ne’ebé fakar hosi ita-nia martir sira. Tanba ne’e, ukun rasik-an la’ós de’it kona-ba bandeira ne’ebé dada no naklekar iha lalehan okos, maibé responsabilidade ida atu harii instituisaun sira ne’ebé harii iha justisa, integridade, no espíritu servisu nian. Ita proteje rai ida-ne’e la’ós de’it ho kilat, maibé ho fuan ne’ebé moos hodi hadook korrupsaun, arogánsia, no hahalok aat hotu-hotu, atu nune’e ita bele hamriik aas ho ita-nia kbiit rasik nu’udar timoroan ne’ebé tane aas naran “pátria” – nasaun.
Iha ita-nia komunidade, ita esensialmente aldeia boot ida (knua) ne’ebé kesi-metin ho lasu amizade, maun-alin, no solidariedade husi “Tasi-Mane ba Tasi-Feto”, husi Illeu Jako to’o rai-ketan Oekusi, no husi Betanu to’o Ataúro. Ita-nia viziñu sira mak ita-nia forsa no ai-riin; bainhira ema ida sidi, ema seluk nia liman prontu atu apoia, no bainhira ema ida tanis, ema seluk nia fuan fahe todan tristeza ne’e nian. Filozofia moris ne’e mak halo ita timoroan loloos – povu ne’ebé hatene simu no fó, povu ne’ebé realiza katak ita-nia ezisténsia sei nunka sai kompletu bainhira ita la moris hakuak malu ho domin no laran-luak, lalehan Timor-Leste nia mahon no Tasi Timor-Leste nia mahein (protesaun).
Domin kompletu ne’e mós tenke abranje ita-nia universu, hanesan rai, foho, no mota sira ne’ebé fó sasin nonook kona-ba ita-nia bei’ala sira-nia ain-fatin iha rai-lulik (Sagradu no Santu) ida-ne’e Prátika la soe fo’er arbiru no mantein limpeza la’ós de’it kestaun estétika ka dezenvolvimentu, maibé valór kulturál, espirituál, no obrigasaun morál atu hatudu katak ita rona ita-nia rai-inan nia hakilar ne’ebé fó iis moris mai ita. Domin ne’ebé nunka bosok mak domin ne’ebé hatene hamoos nia kintál, hatene kuda ai-horis, no konserva natureza nu’udar fatin lulik ne’ebé ita sei hatutan ba jerasaun foun sira.
Tanba ne’e, atu harii Timor-Leste ida ba Timor-oan tomak, ita presiza transforma virtude sira ne’e hotu ba vizaun estratéjika ba moris ne’ebé bazeia ba responsabilidade, dignidade, no prosperidade ba ohin loron no ba futuru. Harii nasaun la’ós de’it responsabilidade Governu nian, maibé responsabilidade sidadaun ida-idak nian ne’ebé tane aas ita-nia identidade kulturál no la husik modernizasaun atu halakon ita-nia valór no lian bei’ala sira-nian. Liuhusi domin ida-ne’ebé nunka bosok, ita kria ekonomia forte, edukasaun, no saúde ne’ebé hakuak ema hotu, atu nune’e legadu ne’ebé ita husik hela ba ita-nia oan no bei-oan sira sei la sai tan istória sofrimentu nian, maibé moris brillante, dignidade, no prosperidade ne’ebé dura, sustentavel, no reziliente.
NOTA INFORMATIVA: Reflesaun ida-ne’e nu’udar responsabilidade pesoál. Reflesaun ida-ne’e mosu espontanea iha lorokraik ida (tersa, 02 juñu 2026) iha Farol, Dili, bainhira haree ‘lixu’ iha fatin balun, sente anin-fresku Dili nian huu husi Ataúro no lidun seluk. Nune’e, lori hakerek-na’in konverte ba liafuan liuhusi hakerek, hodi hato’o sentimentu orgullu no halo reflesaun ida ho vizaun estratéjika, uza liafuan “Domin” nu’udar xave no inspirasaun tanba konsiente katak “Domin nunka bosok.
