OEKUSI, 09 Juñu 2026 (TATOLI) – Diretora Serbisu Rejionál Finansa Rejiaun Administrativa Espesiál Oekusi Ambeno (RAEOA), Adelaide Rosália Faria, rekomenda ba Governu Sentrál liuhusi Ministériu Obra Públika (MOP) no Ministériu Transporte no Komunikasaun (MTK) atu funsiona nafatin Aeroportu Rota Sândalo, nune’e labele abandona.
Notísia relevante:RAEOA aloka rihun $600 iha OJE 2025 hodi subsidia Aero Dili
Adelaide Rosália Faria, hato’o rekomendasaun ne’e, iha enkontru ho Ministru Obra Públika (MOP) Samuel Marçal, iha salaun Gabinete Prezidente Autoridade RAEOA, iha Oekusi, foin lalais ne’e.
“Ha’u-nia rekomendasaun ba Prezidente KAFED, presiza mós alokasaun osan ba kategória sira seluk husi FED, tanba durante ne’e ita ko’alia de’it ba dezenvolvimentu estrada, ponte no seluk tan, maibé oinsa ho aeroportu, tanba ne’e husu ministru MOP, bele koordena tok ho Ministru MTK, tanba aeroportu Oekusi di’ak ona, ita labele husik de’it, Governu gasta ona osan barak ba aeroportu ne’e, entaun hanesan Prezidente KAFED, bele koordena tok ho Primeiru-Ministru no Ministru Transporte no Komunikasaun, atu ba oin presiza tau atensaun, liliu ba futuru tanba oras ne’e Timor-Leste tama ona membru ASEAN, depois investimentu ba otél sira mós durante ne’e abandona,” nia hateten.
Iha fatin hanesan, Prezidente Autoridade RAEOA, Régio da Cruz Salu informa, bainhira vizita hela Aeroportu Rota do Sândalo katak, antes ne’e Autoridade selebra akordu ho kompañia Aero Dili, maibé atu halo operasaun Dili-Oekusi desizaun sei mai husi Governu.
“Kooperasaun Autoridade RAEOA ho kompañia Aero Dili ne’e estratéjiku, maibé ho razaun tanba mina sa’e no merkadu iha Oekusi ladun barak, ne’ebé nu’udar autoridade ita tenki simu, maibé komu orsamentu ba subsidíu, komprometivu iha OJE 2026 labele uza tanba operasaun aviaun ne’e la la’o ona temporariamente, entaun presiza ba oin, aroportu ne’e bele funsiona nafatin,” nia informa.
Notísia relevante:AACTL sei sertifika Aeroportu Rota do Sândalo
Hatan ba rekomendasaun ne’e, Prezidente Konsellu Administrasaun Fundu Espesiál Dezenvolvimentu (KAFED), Samuel Marçal, informa, katak
“Rekomendasaun ohin ne’e, sim, antes ne’e mós ha’u ko’alia ona Ministru Transporte no Komunikasaun, atu hala’o diskusaun hamutuk hodi fó solusaun ba aeroportu Oekusi ninian,” nia hateten.
Notísia relevante:Tékniku Aero Díli halo avaliasaun ba risku no infraestrutura iha aeroportu Rota do Sândalo
Jornalista: Abílio Elo Nini
Editór: Rafael Ximenes de A. Belo
