OÉ-CUSSE 15 Abríl 2024 (TATOLI) – Ekipa téknika hosi Aero Díli hamutuk ho Aeroportu no Navegasaun Timor-Leste (ANATL) no Autoridade Aviasaun Sivíl Timor-Leste (AACTL) halo avaliasaun, ohin, kona-ba risku no infraestrutura sira iha aeroportu Rota do Sândalo molok Aero Díli semo bá Oé-Cusse.
“Ohin, ekipa Aero Dili lori aviun ki’ik mai ne’e halo assessment kona-ba risku saida de’it bele akontese bainhira sira lori aviun boot semo mai Oé-Cusse no kona-ba fasilidade sira iha aeroportu, entaun Autoridade Aviasaun Sivíl nu’udar reguladora sira iha obrigasaun atu mai halo assessment, antes aviaun Aero Dili tuun”, Asesór Aviasaun no Apoia Gabinete iha Prezidente Autoridade RAEOA, Nídio Lobato informa ba jornalista sira, iha aeroportu Oé-Cusse.
Notísia relevante:Aero Dili troka aviaun ZEESM semo bá Oé-cusse
Nídio Lobato esplika katak rezultadu avaliasaun ne’e ekipa téknika Aero Díli sei hato’o fali ba AACTL, depois fó rekerimentu ba RAEOA kona-ba saida de’it maka persiza prepara liga ba bombeiru, seguransa no ekipamentu.
Avaliasaun ba risku ne’e realiza tanba la’ós aviaun ki’ik Aero Díli mak sei semo bá Oé-Cusse, maibé Air Bus A13-20 ne’ebé daudaun halo operasaun husi Díli bá Bali no Díli bá Singapura sei aumenta nia volume vou, kada semana dala rua, segunda no sesta, husi Díli-Oé-Cusse ho kadeira 166 no presu billete $20, ne’ebé nia oras vou nian seidauk determina.
“Tuir rezultadu assessment, kuandu seguransa, bombeiru no fasilidade hotu prepara ona, ita planeia iha inisíu Maiu ne’e bele lansa primeira vou”, nia informa.
Notísia relevante:Rogério Lobato preokupa despeza no reseita husi operasaun aviaun ZEESM
Nídio Lobato salienta kona-ba sertifikasaun aeroportu nian, sei laiha problema tanba aviaun Aero Díli Timor-Leste nian no daudaun ne’e servisu tékniku hosi AACTL, ANATL no RAEOA koordena ona ho Ministériu Transporte Komunikasaun.
“Iha semana ne’e, ami kontinua haree asuntu sertifikasaun aeroportu, ne’ebé ami serbisu paralelu, ami halo ona ajenda diskusaun ho autoridade aeroportuária sira no Ministériu Transporte no Komunikasaun, iha tempu badak aeroportu ne’e bele iha ona sertifkadu”, nia realsa.
Notísia relevante:CNRT-KHUNTO husu investiga polémika kona-ba aviaun ZEESM
Liga ba kestaun ne’e, jornalista Agência Tatoli tenta konfirma ho ekipa téknika hosi Aero Díli, maibé rejeita fó informasaun tanba okupadu ho serbisu seluk.
Relembra katak autoridade RAEOA deside hapara, foin lalais ne’e, vou aviaun ZEESM hodi submete ba prosesu investigasaun tanba identifika mosu irregularidade balun.
Tanba ne’e, atu substitui aviaun ZEESM maka Prezidente Autoridade RAEOA, Rogério Tiago Lobato, akompaña husi Ministru Transporte no Komunikasaun, Miguel Marques Gonçalves Manetelu, Diretór-Ezekutivu Aero Dili, Lourenço de Oliveira, no ANAATL, liuhusi konferénsia imprensa, informa ba públiku hodi solusiona konetividade aérea nian durante aviaun ZEESM tama iha prosesu investigasaun no deside Aero Dili mak sei halo operasaun Dili-Oé-Cusse no Oé-Cusse-Dili.
Notísia relevante: Aero Dili troka aviaun ZEESM semo bá Oé-cusse
Jornalista: Abílio Elo Nini
Editora: Maria Auxiliadora
