OEKUSI, 09 Juñu 2026 (TATOLI) – Autoridade Rejiaun Administrativa Espesiál Oekusi Ambeno (RAEOA), selebra akordu ho Kamára Komérsiu Timor-Leste (CCI-TL) atu promove atividade empreendedorizmu ba investimentu estratéjiku ekonomia iha Oekusi.
Prezidente Autoridade RAEOA, Régio da Cruz Salu, esplika, MoU (Memorandum of Understanding) ka Nota Intendimentu ne’e, akontese atu kompleta nesesidade enkuadramentu institutionál alisiersiku nune’e bele dudu povu ba vida empreendedorizmu no promove papél setór privadu sira, atu bele investe hamutuk ho Governu ba futuru ekonomia zona espesiál.
“Asina MoU ne’e importante atu hamutuk ho CCI-TL, ita halo promosaun ba emprendedorizmu investimentu no serbisu hamutuk iha área prioridade sira no estratéjiku ho reziliénte ekonomia sosiál, polítika no kulturál,” nia hateten iha salaun konevensaun Palaban, ohin.
Nia hateten, MoU ne’e atu konkretiza objetivu dezenvolvimentu ekonomia setór privadu, ne’ebé Governu integra ona nu’udar prioridade estratéjiku nasionál atu haree ekonomia bele kresér.
“Tempu-badak ita sei halo kontratu espesifiku ruma kona-ba investimentu ekonomia sira iha área estratéjiku prioridade sira, ida sei akontese iha setór agrikultura, pekuária, peska no agro-floresta inklui ospitalidade.
Notísia relevante:Programa Movimentu Empreendedorizmu Oekusi ba tinan lima lansa ona
Prezidente CCI-TL, Jorge Manuel de Araújo Serano konsidera katak MoU ne’e, sei reforsa setór privadu sira oinsá bele fó solusaun ba polítika Autoridade RAEOA.
“Memorandum ohin ita asina ona, depois CCI-TL nasionál delega nia pontu vokál ida mai iha Oekusi atu hamutuk ho Autoridade RAEOA hodi halo avaliasaun, maibé semak autór loloos iha Oekusi maka setór privadu sira, tanba emprezáriu ida-ne’ebé, hatene fó solusaun ba problema ne’ebé nia nasaun enfrenta, ezemplu Oekusi maka laiha problema manu-tolu, sei emprezáriu ida mak iha inisiativa halo produsaun, ne’e negósiu di’ak tanba nia fó ona solusaun ba problema ne’ebé maka povu Oekusi enfrenta,” nia hateten.
Notísia relevante:PA RAEOA sei propoin fundu espesiál rihun $500 ba Programa Empreendedorizmu
Jornalista: Abílio Elo Nini
Editór: Rafael Ximenes de A. Belo
