DILI, 10 Juñu 2026 (TATOLI)-Partidu Frente Revolusionária Timor-Leste Independente (FRETILIN) preparadu hasoru Eleisaun Podér Lokál ne’ebé tuir planu sei realiza iha tinan 2027.
Adjuntu Sekretáriu-Jerál FRETILIN, Flávio Maria da Silva, dehan, tuir planu Governu, Eleisaun Podér Lokál sei realiza fazeadamente iha tinan oin, maski agora seidauk hatene muníspiu ida ne’ebé Governu deside atu avansa ba eleisaun, tanba daudaun halo hela avaliasaun ba kondisaun mínima.
Nia hateten katak podér lokál importante tebes atu lori governasaun besik ba povu iha baze ho efisiénsia. Maibé, tuir nia, podér lokál la’ós atu fó de’it kompeténsia ba munisípiu sira atu halo jestaun administrativa, enkuantu fó kompeténsia atu jere rekursu ne’ebé iha hodi halibur mós reseita ruma iha munisípiu hodi sustenta Governu lokál ne’e rasik no Governu sentrál bele fó nafatin apoiu.
Podér lokál sei iha eleisaun Prezidente Kámara Munisipál no asembleia munisipál ka deputadu lokál sira.
“Preparasaun ami-nian mak hanesan agora halo konferénsia postu no munisipál ba reorganizasaun mandatu. Ida-ne’e mós parte ida prepara ba eleisaun munisipál ne’ebé atu mai”, salienta.
Nia dehan sekretáriu-jerál halo ona apelu ba estrutura sub-nasionál sira iha munisípiu atu buka serbisu hamutuk no buka posibilidade entendimentu ruma, halo kontaktu no koordenasaun iha nível munisípiu ho partidu seluk. Tanba atu lori munisípiu ne’e ba futuru di’ak liu tenke iha entendimentu iha nível munisípiu.
“Ida-ne’e hodi bele prepara ba eleisaun munisipál no labele depende husi nivel leten”, dehan.
Kona-ba atividade partidu nian aposta mós formasaun polítika jenérika no liuhusi reuniaun sira ba kuadru sira iha baze. Halo mós reuniaun sira iha nível hothotu husi nasionál to’o baze ho regulár ho forma ida mós atu fó kapasitasaun. “Tanba ne’e, ami-nia kuadru preparadu atu hasoru eleisaun podér lokál”, katak.
Atividade seluk mak sei fó formasaun espesífika no sensibilizasaun pakote kona-ba lei estruturante sira kona-ba podér lokál ne’e rasik atu kuadru sira iha munisípiu entende no hatene di’ak liután importánsia husi podér lokál ho nia funsionamentu no atu hetan legalidade sira.
Notísia relevante: FRETILIN hahú halo konferénsia munisipál hodi halo reorganizasaun mandatu estrutura iha baze
Jornalista: Nelson de Sousa
Editora: Maria Auxiliadora
