MALÁZIA, 15 Junu 2026 (TATOLI)—Prezidente Republika, José Ramos-Horta, akompañadu husi órgaun diplomátiku iha Malázia no ekipa delegasaun halo vizita ba Universidade Taylor’s Lakeside Kampus, hodi halo diálogu ho estudante sira kona-ba “A changing world, enduring values”.
Iha dialogu ne’e, Prezidente Republika, Jose Ramos-Horta, hateten valór husi pás no estabilidade ne’e importante tebes hodi garante demokrasia iha nasaun ida.
“Ha’u mai halo diálogu ho estudante sira tanba ha’u nu’udar nomeadu profesór vizitante iha ne’e dezde tinan ida liubá, entaun bainhira ha’u mai halo vizita eskola ne’e sira husu ha’u atu bele halo konferénsia aula ida ba estudante,” Prezidente Repúblika informa ba jornalista sira iha universidade Taylor’s, Subang Jaya, Malázia.
Xefe Estadu ne’e dehan, iha diálogu ida ne’e iha pergunta barak husi estudante sira kona-ba lideransa, dezafiu iha mundu no problema konflitu.
“Nune’e, ohin, ha’u ko’alia kona-ba prevensaun konflitu, mediasaun no responsabilidade nasaun dezenvolvidu sira iha kestaun seguransa hodi evita konflitu,” nia hateten.
Aleinde ne’e, Laureadu Prémiu Nobel da Páz ne’e hateten, iha pergunta balun mós mai husi jornalista sira kona-ba relasaun Timor-Leste ho Malázia.
“Ha’u temi beibeik dalabarak kona-ba ita-nia relasaun ho Indonézia, maske tempu pasadu ita iha konflitu ba malu maibé sira mós konkorda ho ita-nia desizaun ba independénsia nune’e sira sai duni husi ita-nia rai,” nia dehan.
Nia dehan, Timor-Leste ho Indonézia nafatin iha relasaun di’ak tanba timoroan sira hela iha Indonézia laiha konflitu ruma ho uma-na’in nomós ema Indonézia ne’ebé hela iha timor no halo tan negósiu.
Enkuantu durante diálogu sira ko’alia kona-ba asuntu oioin hanesan pás, estabilidade, ekonómia, teknolojia, prevene konflitu, amigavel, kooperasaun bilaterál, edukasaun, lideransa, progresu ne’ebé Timor-Leste iha no ninia dezafiu sira no Asuntu ASEAN.
Jornalista : Alexandra da Costa
Editór : Cancio Ximenes
