OEKUSI, 16 Juñu 2026 (TATOLI) – Diresaun Serbisu Rejionál Edukasaun Rejiaun Administrativa Espesiál Oekusi Ambeno (RAEOA), deside renova kontratu ba funsionáriu kazuál hamutuk na’in-263 inklui profesór na’in-53 ba périodu fulan neen tanba nesesáriu serbisu edukasaun no apoia nesesidade ensinu aprendizajen.
Iha biban ne’e, Diretór Serbisu Rejionál Edukasaun Oekusi, Vincêncio Cono, hateten, diresaun edukasaun deside estende funsionáriu sira-ne’e, tanba nesesita duni hodi apoia serbisu iha kada departamentu no eskola sira-neʼebé menus profesór atu bele mellora serbisu administrasaun ho efisiente no efikásia iha instituisaun edukasaun.
Nia relata katak, funsionáriu kazuál 263 ne’e, ba tékniku administrasaun hamutuk na’in-92, Gabinete Apoia Tékniku (GAT) hamutuk naʼin-32, guarda eskola na’in-72 no profesór naʼin-53.
Notísia relevante:PA RAEOA sei halo ezersísiu ba OJE 2026 molok rekruta funsionáriu kazuál
“Estensaun kontratu ida-ne’e bazeia nesesidade serbisu, no kontratu ne’e importante atu garante nesesidade serbisu iha edukasaun Oekusi, kontratu ne’e vale ba fulan neen sei termina iha 31 Dezembru 2026, maibe saida mak mensiona iha dokumentu kontratu ne’e, maka prezisa mantein nafatin imi-nia dedikasaun ho profisionalizmu iha serbisu idak-idak nian,” nia hateten iha salaun edukasaun Oekusi, ohin.
Notísia relevante:Funsionáriu EDTL Oekusi 50-resin seidauk selebra kontratu, posibilidade iha tempu-badak
Iha biban ne’e, nia enkoraja funsionáriu kazuál sira, katak selebrasaun kontratu ne’e, la’ós oportunidade, maibé hatudu prestasaun serbisu ho responsabilidade, nune’e bele hadi’a administrasaun públika iha instituisaun edukasaun Oekusi.
Nia hateten, durante fulan ne’e, parte diresaun sei avalia mós dezempeñu funsionáriu idaidak, karik laiha melloria, posibilidade sei hakotu kontratu iha fulan-neen nia laran, tanba pedidu aprovasaun ne’e husi Prezidente Autoridade mak aprova, tanba konsidera edukasaun nesesáriu no presiza funsionáriu kazuál.
“Loloos labele estende tanba razaun orsamentu maibé serbisu edukasaun nesesáriu, entaun kontinua estende tan ba ba fulan-neen.
Jornalista: Abílio Elo Nini
Editór: Rafael Ximenes de A. Belo
