OEKUSI, 28 Maiu 2026 (TATOLI) – Funsionáriu kontratadu na’in-51 iha Eletrisidade de Timor-Leste (EDTL) Rejiaun Administrativa Espesiál Oekusi Ambeno (RAEOA), preokupa tanba kontinua serbisu fulan rua ona, dezde Abríl to’o fulan-Maiu ne’e, seidauk iha selebrasaun kontratu ho Autoridade RAEOA.
Preokupasaun funsionáriu na’in-51 ne’e, hato’o husi Xefe Suku Lalisuk, Hermenegildo Lalisuk katak hafoin funsionáriu sira husu ajuda ba Autoridade lokál ne’e hodi rekomenda ba Autoridade sira atu konsidera.
“Ita-nia funsionáriu sira na’in-51, oras ne’e serbisu voluntarimente, foin daudaun sira balun mai ko’alia ho ha’u atu hato’o preokupasaun ne’e, tanba sira serbisu fulan ona ona seidauk iha kontratu, entaun presiza esplika ba sira, atu hatene, ” nia hateten ba Ajénsia Tatoli,I.P iha Oekusi, ohin.
Tanba ne’e, Autoridade lokál ne’e rekomenda, ba Autoridade RAEOA, presiza fó solusaun, tanba serbisu EDTL esensiál tebes, atu labele fó impaktu ba liña elétrika iha Oekusi.
“Ha’u husu nafatin, tau atensaun ba sira, ha’u mós simu ona informasaun husi funsionáriu sira; preokupa tebtebes, tanba orientasaun husi autoridade tenke kontinua serbisu, maibé kontratu laiha, entaun atu atende nesesidade família oinsá, tanba sira presta dever ba Estadu, entaun sira-nia direitu mós tenke konsidera, ita labele husik de’it sira hanesan ne’e,” nia rekomenda.
Notísia relevante:PA RAEOA sei halo ezersísiu ba OJE 2026 molok rekruta funsionáriu kazuál
Semana oin bele selebra kontratu
Hatan ba rekomendasaun ne’e, Xefe Departamentu EDTL Oekusi, Antão Cabal, rekoñese, katak funsionáriu kontratadu na’in-51 iha EDTL Oekusi seidauk selebra kontratu, maske antes ne’e, submete ona funsionáriu sira-nia dokumentu iha Prezidente Autoridade.
“Funsionáriu kontratadu eziste iha EDTL hamutuk na’in-51, mak to’o agora seidauk asina sira-nia kontratu maibé sira-nia dokumentu antes ne’e iha ona Prezidente Autoridade nia meja, maibé agora viajén hela iha Dili, ne’ebé antes ne’e, ha’u mós simu ona orientasaun katak, tempu-badak, bele akontese iha semana oin, sira bele selebra ona kontratu, hahú husi fulan Abríl, tanba uluk sira-nia kontratu mate iha 31 Marsu 2026, maibé orientasaun husi Prezidente Autoridade katak, tenke kontinua serbisu, atu ahi labele mate”
Tuir nia, bainhira funsionáriu EDTL la kontinua serbisu, ka hapara ona sira-nia kontratu, entaun sei implika ba serbisu EDTL, tanba funsionáriu permanente na’in-15 de’it, labele kontrola suku 20 iha Oekusi.
“Maibé orientasaun ne’ebé Prezidente Autoridade fó sai mai EDTL katak, funsionáriu ida labele sai, tanba serbisu esensiál tebes, entaun kontratu sei la kotu. Ezemplu antes ne’e funsionáriu sira mandate hotu iha 31 Marsu, maibé sira kontinua serbsu to’o agora, entaun kontratu sei hahú husi loron 01 Abríl mai leten,” nia hateten.
Notísia relevante:Posibilidade, Kontratu Funsionáriu 1.500-resin iha RAEOA sei “hapara”
Jornalista Ajénsia Tatoli,I.P, tenta konfirma asuntu ne’e ho Prezidente Autoridade RAEOA, Régio da Cruz Salu, maibé laiha fatin tanba dadaun ne’e partisipa hela iha aprezentasaun orsamentu retifikativu iha Parlamentu Nasionál.
Maibé antes ne’e, iha loron 12 Marsu 2026, Prezidente Autoridade RAEOA), Régio da Cruz Salu, deklara ona katak, autoridade entrega ona karta informativa ba funsionáriu kontratadu no termu sira hamutuk naʼin-1.597 atu ‘hapara kontratu’ iha loron 31 Marsu 2026 ne’e, bazeia ba orientasaun husi Komisaun Funsaun Públika (KFP), só diresaun tolu maka nesesáriu atu kontinua mantein hanesan Diresaun Rejionál Saúde, Diresaun Rejionál Edukasaun no Departamentu EDTL.
Jornalista: Abílio Elo Nini
Editór: Rafael Ximenes de A. Belo
