Komisáriu Asistente José Soares no Ismael Babo nomeadu sai ekipa juri ba Komisaun rekrutamentu PNTL

DILI, 16 Juñu 2026 (TATOLI)—Komandu Polísia nasionál Timor-Leste (PNTL) nomea ona atuál Komandante Komandu Pesoa Formasaun, Komisáriu Asistente Polísia José Soares no Superintendente Xefe Polísia Ismael Babo hodi lidera ekipa juri ba rekrutamentu membru foun Polísia.

“Ha’u hili ona ema na’in-rua Komandante José no Komandante Ismael Babo,” Komandante Jerál PNTL, Komisáriu Asistente Polísia Afonso dos Santos, hateten, iha ninia Gabinete Ministériu Interiór, Vila Verde, Tersa ne’e

Nia dehan, nu’udar Komandante Jerál PNTL fó konfiansa másimu ba Ofisiál Superiór hodi lidera Komisaun Rekrutamentu liuliu hodi sai juri iha rekrutamentu foun ne’e.

“Ha’u fó konfiansa ba ha’u-nia ema, halo nusa mak ha’u labele konfiansa,” nia katak.

Notísia relevante : Polémika rekrutamentu PNTL hein desizaun Konsellu Ministru

Komandante garante, prosesu rekrutamentu sei la’o ho di’ak, ransparante no justu. Komandu hato’o hela preparasaun rekrutamentu membru foun PNTL sira ba Ministru Interiór.

“Iha enkontru ne’e laiha orientasaun seluk, orientasaun mak ne’e prepara ba rekrutamentu membru foun na’in-750 tama ba Sentru Formasaun,” nia informa.

Komisáriu Asistente Polísia Afonso dos Santos dehan, kona-ba konkursu ba vaga PNTL ne’e buat hotu prepradu no Fulan-Jullu sei hahú anúnsia vaga rekrutamentu membru foun

Antes ne’e, Governu liuhusi Konsellu Ministru aprova ona rekrutamentu vaga membru Polísia ne’e hamutuk na’in-750 nune’e iha rekrutamentu númeru referida sei mantein.

“Daudaun hala’o hela prosesu, labele dehan prosesu ne’e to’o ona iha ne’ebé. Loos kaa lae, ha’u lakohi barak ida, ba futuru mak ha’u sei ko’alia”, nia tenik.

Jornalista     : Natalino Costa

Editora          : Julia Chatarina