PNTL asegura ona suspeita ne’ebé tenta abandona bebe iha Dom Bosco
DILI, 16 Juñu 2026 (TATOLI)—Xefe Seksaun Investigasaun Kriminál Komandu Munisípiu Díli, Superintendente Asistente Polísia, Rogério Dos Reis, informa, membru Polísia Nasionál Timor-Leste (PNTL) asegura ona suspeita ida ho inisiál AMK ne’ebé tenta abandona nia bebe iha Dom Bosco, foin lalais ne’e.
Sidadaun feto AMK tenta atu soe nia bebe mane ida, iha Aldeia 04 Setembru, Suku Komoro – Dom Bosco, Postu Administrativu Dom Aleixo, Munisípiu Dili, iha Domingu (14/06) maizumenus tuku 10:00 dadeer.
“Iha informasaun ne’ebé Polísia rekolla katak suspeitu AMK soe nia oan iha área Dom Bosco no motivu tanba hetan presaun psikolojia husi família sira, liuliu nia aman siak demais, dalaruma bele baku mate nia no oho nia, entaun ida-ne’e mak nia tauk, intensaun ida hakarak estraga ka soe bebe ne’e,” Superintendente Asistente Polísia Rogério Dos Reis relata ba Jornalista sira iha Komandu PNTL Dili, Kaikoli, Tersa ne’e.
Notísia relevante : Ema deskoñesidu soe bebé iha mota Vikeke Vila ho kondisaun mate
Nia dehan, seluk mak dalaruma mós presaun psikolojia husi nia kolega sira no la fó hanoin di’ak nu’udar bebe nia inan.
Sidadaun feto ne’e hanesan mós funsionáriu iha Dom Bosco, depois nia partus bebe oan ida, nia falun ho hena, tau iha nia fatin hodi telefone ba kolega serbisu, nia bosok nia kolega dehan ema soe bebe mak nia hili.
“Maibe la’ós hanesan nia ko’alia ne’e, bainhira sasin ne’e to’o fatin, orientasaun husi Amu Padre Parokia Dom Bosco nian konsege lori bebe oan ne’e bá Sentru Saúde Kampung Baru hodi halo tratamentu,” nia akresenta.
Hafoin simu informasaun, membru PNTL liuhusi Komandu Munisípiu Dili inklui Vulneravel Person Unit (VPU, sigla inglés) to’o kedas iha fatin akontesimentu hodi asegura suspeita no lori bá parte médiku hodi hetan tratamentu no kontinua mai iha VPU hadi halo prosesu.
“Temporária bebe ho nia inan, parte saúde halo hela tratamentu iha Ospitál Nasionál Guido Valadares, bainhira nia kondisaun rekupera mak mak ita bele entrega ba nia família sira,” Rogério Dos Reis, hatutan.
Nia dehan, suspeita ho nia oan kontinua halo tratamentu saúde maibé prosesu la’o nafatin, sei prega ho artigu tentativa Kódigu Penál Timor-Leste iha artigu 23° no 143° kona-ba inan abandona, la kuidadu nia oan no tau iha risku nia laran, tama iha kategoria tentativa Expozisaun Abandonadu, prosesu hotu-hotu sei aprezenta bá Ministériu Públiku (MP), haroin de ne’e halo akuzasaun iha Tribunál mak deside tuir pena.
“Polísia kontinua buka tuir bebe nia aman, bainhira bebe nia inan rekupera hafoin halo indentifikasaun ba Bebe nia aman ne’e sé. Polísia sei halo investigasaun kle’an ba suspeita AMK ho idade 20-resin atu prosesu kontinua,” Superintendente Asistente Polísia, tenik.
Jornalista : Natalino Costa
Editora : Julia Chatarina
