DILI, 17 Juñu 2026 (TATOLI)-Komisaun A ne’ebé trata Asuntu Konstitusionál no Justisa aprova relatóriu no pareser ba audiénsia públika ba sétima alterasaun Kódigu Penál.
Prezidente Komisaun A, Natalino dos Santos, dehan hafoin audiénsia hodi rona opiniaun no kontribuisaun husi parte Governu, sosiedade sivíl, konfisaun relijioza, komisaun aprova relatóriu no pareser hodi bele submete ba meza Parlamentu Nasionál hodi ajenda ba diskusaun iha plenária faze jeneralidade.
Alterasaun ne’e halo aditamentu ba kriminalizaun defamasaun no injúria, asédiu seksuál no insestu.
Kestiona kona-ba Prezidente Repúblika sei veta ba lei kriminaliza defamasaun, nia dehan ne’e opiniaun no deputadu sira iha kompeténsia atu halo lei. Agora, sosiedade sivíl sira iha Estadu direitu demokrátiku bele ko’alia.
“Prezidente iha direitu ko’alia. Loloos Prezidente labele deklara antisipadamente, tanba kompeténsia Prezidente nian Konstituisaun fó kuandu lei tama ba iha ne’ebá, iha direitu atu veta no promulga, soké triste mak Prezidente deklara uluk tiha ona”, nia hateten.
Deputadu salienta katak ida-ne’e sei la hamate inisiativa kompeténsia deputadu, tanba halo lei ne’e bazeia ba hanoin no preokupasaun sosiedade nian.
Nia hateten presiza halo ajustamentu ba melloramentu Kódigu Penál tanba iha ligasaun ho prosesu tuirmai atu haree fali Lei Protesaun Dadus, Lei Siberseguransa no Sibernétika.
“Ida-ne’e mak ita halo uluk alterasaun ba Kódigu Penál no lei sira ne’e atu regula nasaun no sidadaun hothotu”, katak.
Notísia relevante: Prezidente Ramos-Horta husu PN adia diskusaun ba Lei Kriminaliza Difamasaun
Jornalista: Nelson de Sousa
Editora: Maria Auxiliadora
